Asociacion de Gaiteiros Galegos

Gaiteiros galegos
Inicio / Novas

Novas

Asamblea Xeral Ordinaria da AGG

Varios / 30.03.17

logo agg oficial carteis pqO vindeiro domingo 2 de abril a Asociación de Gaiteir@s Galeg@s celebra a súa Asamblea Xeral anual.

Será ás 11:00h. en primeira convocatoria, e ás 11:30h. en segunda convocatoria. Este ano celebrarase no Auditorio do Museo do Pobo Galego, sito na Rúa San Domingos de Bonaval S/N, Santiago de Compostela.

Na asamblea, entre outros puntos a tratar, farase un repaso polas actividades realizadas e tamén se falará dos proxectos de futuro nos que se está a traballar, de maneira que todos @s soci@s poidan ver de primeira man o traballo acometido pola asociación.


Lembramos a figura do noso Presidente de Honra, o gran mestre Ricardo Portela, cando se cumpren 25 anos do seu pasamento.

Varios / 24.03.17

foto asociacion gaiteiros galegosO Gaiteiro de Viascón

Ricardo Portela Bouzas (Viascón, 1920- Pontevedra, 1992) é un dos máis recoñecidos gaiteiros do país. 

Foi, nuns tempos nos que os gaiteiros ficaban ao final da lista nos carteis das festas como “gaitas del país”,  un firme defensor da gaita e da figura do gaiteiro. Como dicía o mestre “O gaiteiro é o interprete das esencias mais xebres da música de Galicia; ten nas súas mans o instrumento representativo dun pobo”.

A el debémoslle os nosos comezos, pois a finais dos anos 70 participou nas primeiras “Xuntanzas de Gaiteiros e Artesáns” celebradas primeiramente en Ortigueira e posteriormente en Melide. Estas xuntanzas foron o punto de partida da creación da Asociación de Gaiteir@s Galeg@s da que Portela foi presidente fundador e da cal segue sendo Presidente de Honra.

Ricardo Portela ocupa por méritos propios un lugar destacado na historia da nosa gaita ao carón de Manuel Villanueva, Perfecto Feijóo, Xoán de Campañó ou Avelino Cachafeiro, dos que foi admirador e continuador, a súa figura foi o elo fundamental entre a gaita tradicional e a gaita actual. Reivindicou o toque pechado, as formas propias e diferenciais de tocar a gaita galega e negouse sistematicamente a facer soala gaita nos intres e lugares onde non se escoitase coa debida atención e respecto. O seu repertorio foi e segue sendo fonte de inspiración para tod@s @s gaiteir@s galeg@s.

Nos últimos anos Ricardo sufriu unha anxina de peito e os médicos recomendáronlle que deixase a gaita mais el, como di Jose Luis Calle na biografía do gaiteiro, preferiu “gaita con risco que vida sen gaita”.

E hoxe facemos unha semblanza na súa memoria, pois o 24 de marzo de 1992 faleceu dun ataque ao corazón, hai hoxe 25 anos.

 

Azul de Bueu presenta o seu primeiro traballo discográfico no Teatro Principal de Pontevedra.

Varios / 22.03.17

O vindeiro domingo 26 de marzo ás 12 a.m., en sesión matiné, Azul de Bueu presentará o seu primeiro traballo discográfico no Teatro Principal de Pontevedra.

azul de bueuAzul de Bueu é un proxecto musical interpretado por seis músicos de recoñecido renome da escena galega da música tradicional e o jazz onde os temas tradicionais son tratados dun xeito moi semellante ao que os músicos de jazz trataron as melodías e cancións populares americanas que acabaron por se converter en “standards”.

A partir das melodías da tradición vogal galega, Azul de Bueu quere amosar a súa proposta interpretándoas con cores harmónicas e tímbricas xenuinamente jazzísticas. Podemos falar dun auténtico jazz galego. Os puntais do proxecto son os ritmos, as melodías, as escalas, as harmonías, a improvisación e a flexibilidade formal. En todos estes aspectos Azul de Bueu atopou fortes e fermosos nexos de unión entre a tradición oral galega, o jazz e outras músicas modernas. Azul de Bueu é un proxecto de fusión onde se afonda no repertorio máis antigo e tradicional galego para introducilo no universo do jazz e a música moderna, sempre dende o respecto á tradición e o afán innovador.

Azul de Bueu son:

Sonsoles Penadique (voz, acordeón diatónico), Xosé Miguélez (saxo), Wilfried Wilde (guitarra), Alexandre Touceda (contrabaixo), Iago Fernández (batería) e Virxilio da Silva (dirección artística, guitarra).

Para este concerto de presentación Azul de Bueu contará con colaboracións como a da contacontos Vero Rilo e @s cantador@s e bailador@s de Traspés.

 

 

Homenaxe a Ricardo Portela, 25 aniversario do seu pasamento

Varios / 22.03.17

ricardo portela homenaxeO vindeiro 24 de marzo cúmprese o 25 aniversario do pasamento de D. Ricardo Portela Bouzas (Viascón 1920-Pontevedra 1992), unha data moi importante para a Asociación de Gaiteir@s Galeg@s xa que falamos do seu Presidente fundador e Presidente de Honra. Co gallo da efeméride realizaranse distintas actividades conmemorativas nas que participará a AGG en Cerdedo-Cotobade e máis en Pontevedra, que foron impulsadas por Oscar Ibañez, e nas que colabora a Xunta de Galicia, Consellería de Cultura, Educación e Ordenación Universitaria, a través da Secretaría Xeral de Cultura, Deputación de Pontevedra, a través da Área de Cultura, Concello de Pontevedra e Concello de Cerdedo-Cotobade.

Os actos previstos iniciaranse en CERDEDO-COTOBADE ás 12.30 horas cando terá lugar unha Ofrenda floral no busto de Ricardo Portela. Praza do Concello, Carballedo.

Pola tarde, xa en PONTEVEDRA, ás 17:00 horas haberá pasarrúas cos Gaiteiros das Rías Baixas, Os Alegres e Foula. As 18.30 h descubrirase unha placa conmemorativa na rúa do Laranxo, 8 e ás 21:00 h terá lugar unha Gala homenaxe no Teatro Principal que estará conducida por Ramon Pinheiro na que se presentará o CD “Aires de Pontevedra. Homenaxe a Ricardo Portela 25 Aniversario Pasamento” de Oscar Ibáñez, ademáis de outras entrevistas e actuacións musicais.

 

 

 

V CERTAME DE DEBUXO PARA ESCOLARES “OS INSTRUMENTOS DA MÚSICA TRADICIONAL GALEGA” ORGANIZADO POLA TRADESCOLA

Varios / 16.03.17

mosaico tradO certame de debuxo “Os Instrumentos da Música Tradicional Galega” é unha iniciativa posta en marcha pola Tradescola en colaboración coa Área de Cultura da Deputación e que acada este ano a súa quinta edición.

A finalidade desta actividade, dirixida a arredor de 2.000 nenas e nenos de primeiro, segundo e terceiro curso de primaria dos centros de ensino do Concello de Lugo, é potenciar e difundir entre os máis pequenos a música tradicional galega, axudar a que coñezan os nosos instrumentos, a nosa historia e costumes dun xeito natural dende os primeiros anos, fomentando actitudes de respeto e valoración da mesma.

É necesario que se produza un proceso de transmisión da cultura, o que constitúe unha garantía da conservación das nosas tradicións e, en definitiva, do noso patrimonio cultural.

A Tradescola constitúe un proxecto educativo xestionado pola Asociación de Gaiteiros Galegos que busca formación para todas e todos aqueles que queiran achegarse á música e ao baile tradicional galego. A maiores, organiza actividades complementarias vencelladas coa difusión da cultura tradicional, como é o caso deste V Certame de debuxo ‘Os Instrumentos de Música Tradicional Galega’, co que ademais de fomentar o coñecemento da nosa cultura musical, axúdase a potenciar as destrezas manuais e a imaxinación dos rapaces.

Os escolares terán de prazo para a presentación dos seus debuxos até o 5 de abril, posteriormente os debuxos serán expostos na Tradescola e un xurado formado por profesores da Tradescola seleccionará aos 10 finalistas que recibirán como agasallo un lote de material didáctico e a un gañador ou gañadora que recibirá como agasallo ter para o vindeiro ano a matrícula gratuíta na Tradescola para cursar a ensinanza que desexe das que se ofertan.

II Xornadas de Percusión Tradicional

Varios / 14.03.17

curso percusin -gaiteiros ras baixasO vindeiro 2 de abril en Pontevedra terá lugar un curso de 7 horas de duración impartido polo percusionista Andrés Vilán
Haberá dúas modalidades de participación: como alumno activo (40 €) e como oínte (15 €). Indicar a modalidade ao facer a inscrición.
Para a primeira modalidade só son necesarios uns coñecementos básicos sobre agarre, golpeo e ritmos tradicionais galegos. Dirixida, principalmente, a tamborileiros de calquera nivel (desde inicial ata avanzado), percusionistas en xeral ou gaiteiros con coñecementos de percusión.
Para a segunda modalidade non é necesario ningún requisito. Dirixida, principalmente, a gaiteiros sen coñecementos (ou moi poucos) de percusión, músicos de calquera instrumento ou afeccionados á música.
Os alumnos activos é conveniente que leven tambor e baquetas.
Os alumnos oíntes disporán do mesmo material que os activos, poderán preguntar, pero non participar nos exercicios prácticos.
Prazas limitadas (segundo orde de inscrición).
Xantar opcional.
Inscrición e información:
Teléfono: 639908788.
e-mail: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo
Organiza: A.C. Gaiteiros das Rías Baixas.
Colaboran: Casa da Cultura de Lérez, Carlos do Viso e Missom.

Dorothé Schubarth, premio honorífico dos IV Martín Códax da Música

Varios / 13.03.17

1142dorotheA Asociación Músicos Ao Vivo (MAV) ven de outorgar o premio honorífico dos Martín Códax da música a Dorothé Schubarth recoñecendo o seu labor de recollida do Cancioneiro Tradicional Galego

Segundo a directiva de MAV, “As novidosas achegas metodolóxicas de Dorothé Schubarth, a súa xenerosidade, a súa condición de muller intrépida e empoderadora doutras mulleres, así como o insuficiente coñecemento do alcance do seu legado por parte da sociedade galega, convértena na indiscutible merecedora do Premio Honorífico 2017 outorgado pola Asociación Músicos ao Vivo, que recollerá na gala de entrega dos IV Premios Martín Códax da Música, o vindeiro 3 de maio no Pazo da Cultura de Pontevedra”

Máis información premendo no título da nova.

XXII Xantar Gaiteiro, o 26 de marzo en Rianxo

Varios / 13.03.17

xxii xantargaiteiro3-01A Asociación de Gaiteir@s Galeg@s ten o pracer de convidarte ao tradicional Xantar Gaiteiro, que nesta 22ª edición celebrarase no Concello de Rianxo o vindeiro 26 de marzo.

Como xa sabes, esta xuntanza ten como finalidade principal a de pasar un día agradable en compaña dos que gostamos da música tradicional, creando así un punto de encontro, de intercambio e de festa. Ademais, queremos aproveitar a celebración para render unha merecida homenaxe a Xosé Romero fundador do mítico grupo Os Rosales, e a Maruxa Miguéns quen durante máis de corenta anos, marcou o ritmo coa percusión, e lle deu un estilo especial ao grupo cando comezou a cantar.
O programa será o seguinte:

12:00h. Homenaxe a Maruxa Miguéns e Xosé Romero (Os Rosales). O acto terá lugar no Auditorio Municipal do Concello de Rianxo (Paseo Ribeira, 120).

13:00h.Roteiro polos bares.

14:30h. XXII Xantar Gaiteiro no restaurante Casa Pachín (Ourolo, 107 - TARAGOÑA).

MENÚ : Cocido, postre, chupito e café.

Viño, refrescos e augas

PREZO : 20 euros por persoa que serán entregados ao entrar.

Para poder asistir ao xantar será necesario a previa inscrición. Data límite para a reserva: 22 de marzo.

Mais información e reservas nos teléfonos 986 84 70 74 / 982 22 99 66 ou a través do correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo

Non faltes!!!!!Esperámoste!!!

Homenaxe a Mingos Lorenzo no Recuncho da Palleta

Varios / 10.03.17

lume na palleiraO vindeiro domingo no Recuncho da Palleta recordaremos a Mingos Lorenzo cunha sentida homenaxe.

Mingos Lorenzo formaba parte de ese grupo de artistas que fixo da nosa música unha parte imprescindible da súa vida.
Mingos foi gaiteiro, compoñentente do grupo A Roda, cos que compartiu o gusto polo canto popular e as reunións de amigos, foi tamén membro fundador do Orfeón Treixadura cos que compartiu moitos anos de amizade, de aprendizaxes, de música...e de outros grupos de música tradicional.

Foi sen dúbida un dos grandes artistas de Galiza, unha persoa moi querida por todos e que ten moito aportado ao mundo da música tradicional.

Non te perdas o domingo as 17:00 horas Lume na Palleira

 

OBRADOIRO DE REGRAXE DE ZANFONAS NA TRADESCOLA

Varios / 10.03.17

cartazobradoiro regraxezanfona2017-01 4O vindeiro venres, día 24 de marzo terá lugar na Tradescola un obradoiro de regraxe de zanfona impartido por Xaneco Tubío.

Se estás interesado en asistir podes anotarte chamando ao 982229966 ou no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo

OBRADOIRO DE REGRAXE DE ZANFONAS

DATA: 24 DE MARZO 2017

IMPARTE: XANECO TUBÍO

HORARIO. DE 16.30 A 19.30 HORAS

LUGAR :  TRADESCOLA ( Rúa Pintor Corredoira nº 4 - Lugo)

PRAZAS LIMITADAS

PREZO:

5€ (ALUMNOS TRADESCOLA /SOCIOS DA AGG)

15€ (Público en xeral)

Páxina 8 de 379