Asociacion de Gaiteiros Galegos

Gaiteiros galegos
Inicio / Novas

Novas

Presentación do libro-CD MÉTODO DE TAMBOR GALEGO do percusionista Andrés Vilán na Tradescola.

Varios / 03.04.18

presentacion tambor_andresvilan--01 - pqO vindeiro día 9 de abril, ás 19:00 horas, terá lugar na Tradescola (Salón de Actos do Centro Lug 2, na rúa Pintor Corredoira, nº 4 - Lugo) a presentación do MÉTODO DE TAMBOR GALEGO do percusionista Andrés Vilán.

Con este libro-CD o autor pretende asentar as bases deste instrumento, comezando polos conceptos máis básicos ata outros máis avanzados e, deste xeito, sistematizar unha técnica propia e axeitada desde calquera punto de vista: técnico, musical e histórico.

Esta obra está considerada pola crítica como a máis importante no seu campo dentro da percusión tradicional galega. Actualmente está á venda a segunda edición, despois de esgotarse a primeira en menos dun mes desde a súa saída ao mercado.

Tras case dúas décadas de experiencia docente, e debido á falta de métodos específicos para tambor galego, o autor, Andrés Vilán, decide publicar esta obra co fin de encher o baleiro existente neste eido.

Este traballo, de máis de cen páxinas, segue a estrutura dos catro bloques principais (O tambor galego, Sistema de notación, Técnica e Padróns rítmicos) empregada polo autor ao longo de moitos anos, tanto nas súas aulas regulares como nos obradoiros e master classes, e posteriormente imitada por outros percusionistas do país no seu labor docente.

Nun primeiro bloque amósanos a orixe e evolución dos diferentes tambores presentes na nosa tradición, así como as súas principais características e o seu funcionamento mecánico. No seguinte bloque preséntanos un sistema de notación propio para o tambor galego, desenvolvido a partir do sistema monolineal creado polo Dr. Fritz Berger. No terceiro céntrase na técnica propiamente dita, traballando diferentes conceptos, como o agarre, o golpeo ou o redobre, con case cen exemplos prácticos. No último bloque amósanos preto de trescentos padróns dos principais ritmos da música tradicional galega e o arranxo para tambor de catro obras para gaita.

Este método vén apoiado por numerosas fotografías e un CD con máis de cen cortes de audio con gran parte dos exercicios e padróns rítmicos vistos anteriormente, así como coas catro obras para gaita, con e sen percusión. Nestas catro obras colaboran os músicos Edelmiro Fernández, Pablo Dalama, Oscar Ibáñez, Álvaro Novegil, Iván Costa, José Manuel López e Cristian Silva.

Neste acto contarase, ademais, coa presenza de Álvaro Novegil, representante da Editorial Gaiteiros das Rías Baixas e músico colaborador neste libro-CD.

Pesar polo pasamento do gaiteiro e palleteiro Rubén González

Varios / 31.03.18

rubenHoxe temos que informar dunha triste nova. A música tradicional está de loito polo pasamento do gran gaiteiro e palleteiro Rubén González. 

Un home moi querido e xeneroso, que loitou moito por conseguir o seu ansiado soño: ser gaiteiro. Rubén González foi zoqueiro, ferreiro, traballou na mina de magnesio e incluso foi enterrador, compaxinando sempre todos estes traballos coa defensa permanente da cultura galega.

Foi neto dun membro da banda de Noceda (O Incio) de principios do século XIX, e iniciouse moi novo no mundo da música. Foi gaiteiro en Entrimo (Ourense), en Noceda e co grupo ‘Os Agarimos’.

Durante moitos anos adicouse a fabricación de palletas, moitas das cales foron exportadas a outros países. O seu traballo a favor da música tradicional valeulle numerosos premios e homenaxes, como o “Constantino Bellón - Gaita de Ouro”, a insignia de Ouro e o recoñecemento de Fillo Adoptivo do Concello do Incio, ser pregoeiro da Mostra de Instrumentos Tradicionais de Pardiñas e tamén o recoñecemento como  Socio de Honra da Asoc. Cultural Cántigas e Frores entre outros.

Mañá domingo día un, ás CINCO E MEDIA da tarde no Tanatorio de Monforte terá lugar á oración de celebración da palabra; e seguidamente a condución do cadáver ata o Cemiterio Parroquial de Castelo de Somoza (O Incio). 

Dende a Asociación de Gaiteir@s Galeg@s compartimos a dor e lamentamos fondamente a perda de Rubén, un membro destacado e ben querido desta gran familia da AGG.

DEP



No vindeiro programa da Rumboia, en openradio.es falaremos do grupo Os Carapaus

Homenaxes, Premios, Recoñecementos, .... / 28.03.18

rumboia - copiaNo vindeiro programa da Rumboia, en openradio.es falaremos do grupo Os Carapaus. Lembra escoitalo todos os sábados ás 13.00 horas en http://www.openradio.es/rumboia

Os Carapaus – Conservas de Música Tradicional

No ano 2012 publícanse as Conservas de Música Tradicional, primeiro traballo discográfico de Os Carapaus. Un grupo versátil que fai a festa no turreiro, na corredoira, na praza ou dende o escenario. Naquela primeira propostas musical de Os Carapaus participaron:  Emilio Lois,  gaiteiro da Baña,  mestre en numerosas asociacións de música e cultura tradicionais; Oli Xiráldez (frautas), artesán e músico de longa traxectoria;  Gustavo Couto (voz e tamboril),  mestre de baile tradicional;  Sabela  Galbán  (voz  e  acordeón),  estudante  de  frauta  traveseira  no Conservatorio de Música Superior da Coruña, e Adrián Lareo (bombo e voz).

 

O vindeiro Recuncho da Palleta estará adicado á memoria da recentemente falecida Manuela das Marianas de Barro de Arén – Cerdedo.

Varios / 28.03.18

lumepalleiraNo vindeiro Recuncho Da Palleta, Guillerme Ignacio Costa lembrará á recentemente falecida Manuela das Marianas de Barro de Arén – Cerdedo.

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.

E lembrade que nas madrugadas de luns a martes (de 01:00h a 02:00h), na Radio Galega, tedes unha cita coas "Escolmas Musicais" de Lume Na Palleira.

 

 

SONS DE ABRIL NA TRADESCOLA

Varios / 27.03.18

concerto sonsabril-01 -pqO vindeiro luns 2 de abril, despois das vacacións de Semana Santa, esperámosvos no concerto SONS DE ABRIL, un concerto-audición a cargo de alumnado da Tradescola no que participarán alumn@s das escolas de gaita, percusión, requinta, baile, canto e pandeireta, acordeón, zanfona!!

Será no salón de actos da TRADESCOLA (Rúa Pintor Corredoira nº 4 - Lugo) a partir das 19.30 horas!!! Non faltedes!!!

Entrada de balde!

O Serán do Sor - O Barqueiro

Varios / 27.03.18

o sern do sarO vindeiro xoves, 29 de marzo, o Barqueiro acollerá O Serán do Sor, co seguinte programa:

14.00 horas - sesión vermú OÎMA

A.C. Amigos da Gaita Galega de Ribadeo

20.00 horas - Serán

O Son do Sor, As Parrochas, Os Trevillas, As Moreninhas, Medio Quinhón, A.C. Son D´aquí, A.C. Amigos da Gaita Galega de Ribadeo e mais...

23.00 horas - Os Carecos

00.00 horas BÖJ

Non faltedes!!

Enreguéifate no vindeiro Recuncho da Palleta!!

Varios / 23.03.18

lumepalleiraNo vindeiro Recuncho Da Palleta, Gustavo Couto contará cunhas visitas que nos falarán da nova edición do Enreguéifate!!

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas, 

E lembrade que nas madrugadas de luns a martes (de 01:00h a 02:00h), na Radio Galega, tedes unha cita coas "Escolmas Musicais" de Lume Na Palleira.

No vindeiro programa da Rumboia, en openradio.es falaremos do grupo Leña Verde

Varios / 23.03.18

rumboia - copiaNo vindeiro programa da Rumboia, en openradio.es falaremos do grupo Leña Verde. Lembra escoitalo todos os sábados ás 13.00 horas en http://www.openradio.es/rumboia

A Contratempo é o traballo que, no ano 2010, foi producido polo grupo Leña Verde no concello de Pol (Lugo). Un traballo colectivo de veciñas e veciños unidos polo amor á música e á terra que materializaron tres discos ate o de agora. Leña Verde de Pol (1998); Lares (2003) e A contratempo (2010). Leña Verde retomou, no ano 1994, o nome e a actividade dunha agrupación que mantivera a actividade cultural neste Concello lucense nas décadas dos 50 e 60. Daquela formación orixinal seguen no grupo actual José A. Brañanova, como percusionista; e Maruja Rielo desenvolvendo tarefas de produción.

 

1º Encontro de Música Tradicional Galega en Betanzos

Varios / 23.03.18

encontro musica trad betanzosMañá, 24 de marzo, terá lugar o 1º Encontro de Música Tradicional Galega AsMuBe, organizado pola Asociación de Músicos de Betanzos, que reunirá nunha actuación conxunta, a mais de 100 músicos chegados de diferentes puntos de Galicia.
Actuarán:
Escola de Instrumentos Populares Galegos "Suso Vaamonde" , de Arcas da Condesa, Concello de Caldas de Reis
Escola Municipal de Música Tradicional, do COncello de Outes.
Escola de Instrumentos Populares Galegos AsMuBe, actuando como anfitrións, do COncello de Betanzos.
Lugar: Praza da Constitución, en Betanzos, inda que en caso de mal tempo, trasladarase ao Antigo Matadoiro, na Ribeira, tamén en Betanzos.
Horario:
18:00 Pasarrúas.
18:30 Actuación conxunta.
Interpretarán temas populares acompañados de gaitas, zanfonas, acordeóns, percusión diversa, frautíns, ocarinas e contará coa participación de máis de cen músicos, todos eles alumnos das tres escolas mencionadas.
A actuación será precedida por un breve pasarrúas ás 18:00 h, que percorrerá as principais rúas do casco vello da cidade. Seguidamente, a actuación conxunta das tres escolas será ás 18:30 h.
Entrada de balde !!

Obradoiro de xoguetes sonoros (AGG) no mercado de primavera de Ferreira do Valadouro

Varios / 23.03.18

obradoiro xoguetes valadouroMañá sábado a AGG estará no Mercado de Primavera de Ferreira do Valadouro a través dun obradoiro de xoguetes sonoros que impartirá Xaneco. Este obradoiro, que terá lugar ás 17.00 horas na Praza de santa María, ten o obxectivo de aprenderle aos nenos do século XXI, unha serie de xoguetes sonoros que os nenos galegos, de ata mediados do século XX, facían aproveitando os elementos que a natureza lles proporcionaba.
Trátase dunha serie de tres xoguetes recollidos da tradición popular galega, que ata hai ben pouco se transmitiron dunha xeración a outra, normalmente eran os avós, os que lles aprendían aos netos a fecelos. Non podedes perdelo!!! pasaremos lista!!!

Páxina 8 de 398