3º Alcuentru de Pandereta Gallega ya Asturiana

Concertos / 30.10.06

O sábado 18 de Novembro, ímoslle tod@s ata Asturies, gozar xa por terceira vez da convivencia e recoñecemento mutuo cos nosos curmáns. O catalizador xa o sabedes, os cantares e bailes das dúas terras sempre acompañados do son de pelicas e ferreñas. Vaivos un pequeno planin desta edición:
-16:00 h. Os que poidamos, quedamos no lugar do Alcuentru, no enxebre local Sabil do Concello de Santu Adrianu (www.elsabil.net). Dende alí os nosos excepcionais “sherpas” locais levarannos de ruta etnográfico-paisaxística pola contorna (non se descarta rachar a paz cotián dalgunha que outra brava pandereteira asturiana).
-20:30 h. Se non podedes vir á ruta, xuntarémonos tod@s no Sabil e teremos a consabida cea-confraternización, que unha boa “folixa” presta ben máis co bandullo cheo. Pagaremos, coma en Ribadéu, “cada un o seu” :-).
-23:00h. (hora aproximada, que xa se sabe). Concertos dos grupos de pandereteiras Raigañas de Cerqueda (Malpica de Bergantiños-A Coruña) e máis das anfitrionas, división de Muyeres especializada no suroccidente astur.
-1:30h-.... A partir de aí xa sabemos que todo se empeza a poñer turbio e xa un non sabe moi ben se toca pandeireta galega ou asturiana, pero a festa e o bo ambiente de intercambio están máis que garantidos ata que os corpos non dean máis de si.
E cando sexa hora de ir deitar algo a cabeza, teremos o aloxamento ben preto, no albergue do que dispón o propio Sabil, mesmo a carón do local. O prezo está aínda por determinar con exactitude, pero seravos ben axustado.
Información e Inscricións: no teléfono 657 209 731 ou no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo antes do venres 3 de Novembro, indicando o número de persoas que participariades no Encontro.

X Aniversario de Lume Na Palleira.

Concertos / 30.10.06

Lume na Palleira cumpre 10 anos nas antenas da Radio Galega e, para celebralo, o vindeiro domingo 5 de novembro, ás 8 do serán, con rigurosa puntualidade británica según o seu organizador, Emilio Españadero, vaise celebrar, no Teatro Rosalía de Castro de A Coruña, un gran concerto que contará cos seguintes grupos:

Grupo de Música tradicional de IGAEM.
Ruote
Quempallou

Haberá, tamén, invitados e actuacións sorpresa.

Desde a AGG queremos felicitar a Emilio Españadero, presentador do programa, e a todo o equipo de produción da Radio Galega por estes dez anos de bo facer en defensa da música galega en xeral e da tradicional en particular.

Os nosos máis sinceros parabéns.

Xosé Luis Miguelez, primeiro titulado superior en música tradicional

Concertos / 30.10.06

O gaiteiro ourensán Xosé Luis Miguelez Saínza, Pilís, ven de convertirse no primeiro titulado superior en música tradicional, especialidade de gaita, da historia.

O vindeiro 21 de novembro ás 8 do serán, Miguélez ofrecerá o seu concerto de fin de carreira co que dará esta por finalizada. Este é un fito realmente histórico polo que estaremos a compañalo e felicitalo como se merece.

Non volo perdades:

Auditorio Martín Codax do Conservatorio Superior de Música.
Manuel Olivié, nº 23 •36203 VIGO Telf: 986 471144
Martes 21 de novembro ás 20 horas.

Festival Interceltique de Lorient 2007

Varios / 25.10.06

Vimos de recibir a seguinte información de Nacho Ramos.


Logo dunha longa e porfíada reunión do consello d'administració i-o comité do Festival Interceltique de Lorient, tomouse o acordo de voltar a desenrolar este festival nas datas "tradicionaís" tal como se veu facendo, agás neste ano 2006.


Pol'o tanto, o FIL 2007, ano adicado a Escocia, vai desenrrolarse dende o 3 d'agosto hastra o día 12 do mesmo.

Esto quere dicir que, ás "pegatinas" que, eu mesmo veño de doar a moitos gaiteiros e que na data dí: "27 juillet au 5 août 2007", pasan a ser peza pra colecionistas pois o FIL xa ten encarregadas outras coas novas datas.

I Congreso de Ensinantes de música tradicional galega

AGG / 23.10.06

A Asociación de Gaiteiros Galegos organiza o I Congreso de Ensinantes de Música Tradicional Galega.


Tentando cumprir un dos seus principais fins, a normalización da cultura musical de Galicia, a Asociación de Gaiteiros Galegos (AGG), ente que representa non só a gaiteiros, senón tamén a todo tipo de músicos tradicionais, bailadores e demais xente implicada no folclore musical galego, organiza o primeiro congreso de ensinantes de música e baile tradicional.

O I Congreso de Ensinantes de Música Tradicional Galega celebrarase no Auditorio de Galicia, en Santiago de Compostela os días 18 e 19 de Novembro e vai dirixido a todo tipo de docentes, xente interesada neste tipo de ensino e, especialmente, a estudantes universitarios, para os que a asistencia contará como créditos de libre elección para Universidade de Vigo e está en trámites para a Universidade de A Coruña.



Máis información.


Para descargar o progama e boletín de inscrición faga click aquí:

http://www.gaiteirosgalegos.com/xoops/uploads/programacongreso.pdf

Para descargar só o boletín de incrición en formato word faga click aquí:

http://www.gaiteirosgalegos.com/xoops/uploads/inscricion_congreso.doc

Homenaxe a Buxaina; 18 de novembro

Concertos / 17.10.06

Información recibida da Asociación Cultural A Buxaina

Dende A Buxaina dámosvos a coñecer o programa da Homenaxe deste ano que é o seguinte:

Como artistas invitados teremos a:

Xabier Blanco

Vai de Roda

Os Carunchos

No apartado da presentación, algo que esta a coller forza no acto, contamos coa inestimable colaboración de Cándido Pazó.

O acto celebrarase no Centro Cultural Caixanova o sabado 18 de novembro as 19:30h.

Lembrarvos que a entrada é totalmente de balde o único que tedes que facer é recollela no Centro Cultural de Coruxo, ou se sodes de lonxe poñervos en contacto con nos Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo
Enviamosvos un cartel no arquivo adxunto que vos pedimos o imprimades e publiquedes nas vosas respectivas areas de influencia.

Senón che abre o arquivo adxunto preme aquí para acceder o cartel
http://img245.imageshack.us/img245/2982/homenaxewebxw0.gif

Nova tempada de seráns na NASA (Compostela)

Concertos / 16.10.06

Ola, o vindeiro martes, día 17, ás nove e media da noite, encetan na saa NASA en Santiago ás seráns desta tempada.
Os grupos deste martes son:

Gaiteiros do Norte (Fene)
Donaire (A Coruña)
Tataratrío (A Coruña)
Retrouso (A Estrada)

O Fiadeiro, único representante español nun encontro organizado pola UNESCO

Festivais, Foliadas, Romarías / 15.10.06

O grupo de pandereteiras da A.C.F. O Fiadeiro, de Vigo, vai viaxar a Caracas o vindeiro luns para participar no VII Encuentro para la Promoción y Difusión del Patrimonio Inmaterial de Países Iberoamericanos, que se celebrará entre o 17 e o 22 de outubro en Venezuela. Cidades como Maracay, La Guaira, Tintorera ou a mesma capital venezolana acollen unhas xornadas nas que se van tratar, entre outros temas, os problemas derivados da inexistencia de políticas públicas que permitan protexer, difundir e valorar socialmente as culturas ancestrais.

Organizado baixo os auspicios da UNESCO, o encontro traballará a partir de tres eixos temáticos: as políticas da diversidade cultural; a lexislación sobre o patrimonio inmaterial, e o mercado de bens culturais e o seu consumo. Neste contexto, representacións artísticas dos países participantes desenvolverán unha serie de actuacións programadas co título , nas que vai intervir O Fiadeiro representando a España.

O Grupo para a Recuperación de Bailes, Músicas e Cantares Tradicionais O Fiadeiro, que ven de participar no Festival Intercéltico de Lorient durante o pasado mes de agosto, é a primeira agrupación galega convocada a un evento destas características. A entidade viguesa, patrocinada nesta ocasión polo Ministerio de Cultura, recibíu a invitación a través do antropólogo e etnomusicólogo Francisco Cruces, profesor titular da UNED, e do etnomusicólogo galego Luis Costa, e a partir de aí comezou a preparar un espectáculo que, baixo o nome de “Galicia. Nós, a Terra Nosa”, inclúe, ademais de cantos e ritmos tradicionais, algunhas pezas de baile que serán executadas por unha parella de bailadores.

O Fiadeiro abre a inscrición aos cursos da súa Escola de Cultura Tradicional

Cursos / 01.10.06

Logo das vacacións estivais, a Escola da asociación O Fiadeiro abre de novo as portas co comezo do novo curso 2006-2007. O día 2 de outubro volven iniciarse as clases, que como cada ano versarán sobre baile tradicional, pandeireta e canto, gaita, percusión tradicional, costura e pasamanerías, guitarra e danzas do mundo.
O Fiadeiro ven de deseñar un amplo abano de horarios para facilitar a asistencia do alumnado: desde as 4 da tarde ás nove e media da noite. Os diferentes turnos pódense consultar na páxina web da asociación, . Desde esta tamén é posible descargar a ficha de inscrición, a cal, unha vez cumprimentada, deberá ser enviada ao enderezo Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo . Quen o prefira, pode inscribirse telefónicamente chamando ao número 629 585 355, ou ben acudir ao local da entidade, na rúa Romil, número 3, baixo. Neste último caso, o horario é os luns e xoves de sete e media a nove da noite.
As clases manteñen os prezos do pasado curso, é dicir, 15 euros para os socios e 22 euros para as persoas alleas á entidade. Os socios terán igualmente unha rebaixa na matrícula, que pasará de 18 a 9 euros.
No tocante ao profesorado, está integrado na súa meirande parte por membros do Grupo para a Recuperación de Bailes, Músicas e Cantares Tradicionais O Fiadeiro, unha das agrupacións máis senlleiras na recuperación e defensa da cultura tradicional de Galicia. O grupo festexou o seu décimo aniversario o pasado mes de abril coa estrea dun novo espectáculo no Teatro Caixanova, e ven de participar no Festival Intercéltico de Lorient, na Bretaña Francesa, un dos máis importantes dos que se celebran en Europa.

Procura de traballador/a

AGG / 24.09.06

Publicamos carta remitida a todos os nosos socios, referente á procura dun(ha) traballador(a).

Estimado soci@:



Poñémonos en contacto contigo para comunicarche que, por motivos persoais, Sonsoles Martínez deixa o posto de traballo que viña desempeñando con nós desde hai un ano. Debido a inxente cantidade de traballo que os distintos convenios coa Xunta e outros organismos ten a Asociación, temos a necesidade de volver a cubrir ese posto polo que te convidamos a que, se este é do teu interese, nos envíes o teu curriculum o máis urxentemente posible segundo as especificacións que se achegan máis abaixo.

Non queremos deixar pasar esta oportunidade sen agradecer a Sonsoles a súa dedicación e celo no desempeño da súa labor na AGG, e desexarlle o mellor na súa nova andaina.

Sen outro particular, aproveitamos para enviarche un agarimoso saúdo.

Santiago Caneiro Aneiros,
Presidente.

Especificacións para a solicitude do posto de traballo:


Mais información.