Xornadas de Baile tradicional en Vedra - AGG

Varios / 30.11.22

A AGG organiza o domingo 11 de decembro, unha nova edición de xornadas de baile tradicional. Nelas contaremos con relatorios-obradoiros guiados por Mercedes Prieto, Cristina Canosa e Miguel Sotelo.

Os obradoiros destas xornadas, subvencionadas pola Deputación de A Coruña e coa colaboración do Concello de Vedra, están pensadas tanto para os profesionais do mundo da danza, como para todos aqueles interesados no baile tradicional, para que poidan completar os seus coñecementos e participar de xeito activo na mellora e dinamización da nosa tradición. 

PROGRAMA:

XORNADAS DE BAILE

(11 DE DECEMBRO) - Vedra

11.45 - Apertura

12.00 – Relatorio - Obradoiro I

“Bailes raianos” - Mercedes Prieto.

13.30 – Remate sesión da mañá

16.00 - Relatorio – Obradoiro II

“Corte arriba: Recursos para seguir creando. (A Baña)” - Cristina Canosa.

17.30 – Descanso

17.45 - Relatorio – Obradoiro III

“Os bailes en roda: Beariz” - Miguel Sotelo

 DATA: Domingo 11 de decembro

LUGAR: Nave da Estación do Tren de Santa Cruz de Ribadulla, en Vedra.

INSCRICIÓNS (*): Deberán facerse nos teléfonos 986 84 70 74 ou 982 22 99 66 ou enviando un correo electrónico a   Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo  indicando nome, apelidos, un teléfono de contacto e mail. 

* Os obradoiros son de balde e as prazas limitadas, tendo preferencia @s soci@s da AGG, que disporán ata o mércores 7 de decembro para inscribirse, e partir desa data si quedan prazas dispoñibles, cubriranse coas solicitudes de inscrición de non soci@s, por orde de chegada.

A través de actividades como esta, pretendemos non só difundir a cultura tradicional, senón que ademais queremos fomentar este tipo de encontros, que consideramos imprescindibles, xa que se amosa a riqueza cultural dunha maneira aberta, chea de contidos e na que se pode participar de xeito activo, contribuíndo e potenciando deste xeito a divulgación da cultura e a súa conservación.

Fondo pesar polo pasamento de Juan José Iglesias Pena

Varios / 28.11.22

Hoxe temos que informar dunha triste nova, dende a AGG queremos manifestar o noso pesar polo pasamento de Juan José Iglesias Pena.

Persoa ben querida do barrio dos Mariñeiros onde pasou toda a súa vida (na parroquia de S. Pedro de Visma da cidade da Coruña). Iniciou as súas actividades musicais en 1978, no seo da asociación xuvenil Xacarandaina; nela aprendeu a tocar o bombo e o tamboril, e integrouse no grupo de danzas co que participou en gran número de festivais en España e no extranxeiro.Formou parte como percusionista do grupo de baile da agrupación cultural Xilbarbeira; e do grupo de gaitas Asubío (ata a actualidade). Durante anos pertenceu ao grupo de mestres gaiteiros que acompañaban ao Ballet Galego Rey de Viana, e foi membro do Grupo de gaitas do IGAEM (co que gravou varios discos). E mesmo colaborou ocasionalmente con outros grupos da época (Os cinco de Galicia, Millo verde, Xiada, ...)

Dende a AGG compartimos a dor e lamentamos fondamente a súa perda.Que a Terra lle sexa leve.

O vindeiro 29 N, Músicas para a igualdade na Tradescola

Varios / 25.11.22

O vindeiro 29N, a Tradescola, e a AGG organizamos ás 19.30 horas na Capela de Santa María (Lugo) unha actividade musical para a igualdade consistente na charla – concerto que leva por título “ Obradoiro de mulleres que cantan: subimos á escena ou mellor baixamos dela? ” que estará impartida por Branca Villares e por alumnado da Tradescola, concretamente por aulas de perfeccionamento de canto tradicional e de pandeira que poñerán a nota musical da actividade.
Esta actividade organízase co obxectivo de promover e facer visible o noso rexeitamento ante calquera tipo de violencia, e conta coa axuda da area de Cultura do Concello de Lugo e as instalación cedidas polo Centrad.

O aforo é limitado, e accederase por orde de chegada. Esperámoste!!!

IV Edición do encontro Tradición en Feminino

Varios / 11.11.22

Dende Asociación de Gaiteirxs Galegxs organizamos o vindeiro domingo 20 de novembro, en colaboración coa Deputación da Coruña , a cuarta edición do encontro #TradiciónEnFeminino, con relatorios e debates nos que se visibilizará o papel da muller no eido da música tradicional.

Os "Faladoiros Arredor Do Vestir Tradicional" no vindeiro Recuncho da Palleta

Varios / 11.11.22

Este domingo, na sección o "Recuncho da Palleta" do "Lume na Palleira", conducido por Emilio Españadero, contaremos con Ramón Dopico e a visita da asociación Brincadeira, organizadora dos "Faladoiros Arredor Do Vestir Tradicional".
Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.