Descrición

este número catro é un monográfico sobre a história da música na Galiza. Un traballo baseado nos traballos de diversos investigadores do Conservatorio de Música Folque e Tradicional de Lalín (CMFTL) e que nuns días poderás ler, de xeito resumido, nesta nosa web.
Na sección Fontes lembramos a través dun interesante artigo ao músico e compositor vigués Teodosio Vesteiro Torres, ao que lle segue a memoria do CMFTL da man de Ugia Pedreira xunto unha reseña do I Curso de música tradicional galega que se desenvolveu en Compostela entre o 2003 e o 2004. De seguido na sección Investigación Ramom Pinheiro aprofunda no que foi o contexto que viu nascer en 1904 ese primeiro disco galego da pontevedresa agrupación coral Aires d’a Terra. Félix Castro dá conta de dúas referencias do acordeón no s.XIX achados no xornal O Tío Marcos d’A Portela, mentres Norberto P. Cirio apreséntanos o proceso de cambio na gaita galega ao longo da historia, introducíndonos José Piñeiro na construcción deste instrumento. Martín Blanes biografía ao famado violinista galego Manuel Quiroga, facendo o propio José Luís d.P. Orjais con Marcial Valladares arredor dun seu cancioneiro inédito (?).
A frauta no noso país e a internet aplicada á acústica musical serán temas abordados por Cástor Castro e Roberto de Andrés.
Aliás entrevistamos a Mini e Mero, do grupo A Quenlla e a Luís Bará, responsábel de cultura do Concello de Pontevedra, así como lembramos a Manuel María, recentemente falecido, un dos máis grandes poetas da Galiza e dos máis musicados e presentamos, por
último, o Arquivo Sonoro de Galiza do Consello da Cultura Galega.