Asociacion de Gaiteiros Galegos

Gaiteiros galegos
Inicio / Novas

Novas

100 novas partituras na sección de descargas para todos os nosos socios

Publicacións / 05.03.06




O traballo que veñen a facer os compañeiros da Comisión de Partituras da Asociación de Gaiteiros Galegos, liderado desta volta por Eduardo Méndez Baamonde (Dubi) e Ricardo Santos, ven de dar como resultado a revisión exhaustiva dun cento de partituras que estarán ao dispór de todos os nosos socios na sección de descargas (apartado partituras, subapartado pdfs).

Co obxecto de facilitar a súa lectura foron publicadas tanto para en "dó" como en "re". Polo de agora están incluídas todas as partituras de "re" e nos vindeiros días irán aparecendo as partituras de "dó".

Trátase dun traballo que vai moito máis alá da concienzuda transcrición de todas estas melodías. Inclúense en todas elas notas e referencias históricas e, de ser o caso, as correspondentes letras.

Como mostra do excelente traballo coordinado por estes dous compañeiros, inclúese para descarga de calquera internauta a partitura (tanto en "dó" como en "re") da "Danza de Santa María de Torás" do repertorio da Sección Femenina, recompilada en Laracha, por Pedro Echevarría o 1 de Decembro 1954.

Deste xeito, unha vez subidas as partituras de dó teremos máis de 600 descargas para os nosos socios.


Mais información.

O Obradoiro de Gaitas da familia Seivane recolle en Barcelona o Percebe de Prata

Reunións, actos, ... / 02.03.06




O pasado 25 de febreiro tivo lugar a ‘Gran Noite de Galicia en Barcelona 2006’, unha gala á que acudiron varios cargos da Xunta e mesmo o alcalde da Cidade Condal, Joan Clos.

Os galardóns entrégaos dende hai 24 anos a ‘Enxebre Xuntanza do Percebe da Asociación de Empresarios Galegos en Cataluña’ que quixo facer este ano un recoñecemento á gaita. Os membros do obradoiro de gaitas da familia Seivane foron agasallados co Percebe de Prata. O pai de Susana Seivane foi o encargado de levar a Cambre o merecido crustáceo.

Carlos Núñez tamén fora invitado a recoller o seu premio en forma de prezado marisco, mais no último momento anunciou que non podería acudir deixando totalmente desconcertada á organización do evento.

Texo e imaxe extraídos de La Voz de Galicia.

Nova publicación para gaita galega

Publicacións / 23.02.06



O Gaitero Xosé Luís Miguélez acaba de sacar ó mercado o libro “Estudios Volume I: Nivel Iniciación”, dentro dos “Cadernos de Gaita Galega” da editorial Dos Acordes.

O “Estudio” é o paso intermedio entre o exercicio técnico e a peza, unha especie de exercicio con forma musical. Con estas publicacións preténdese aportar unha ferramenta máis, fundamental no estudio de calquera outro instrumento musical, ó ensino da gaita.

Os contidos deste primeiro volume son adecuados para iniciarse, dunha forma amena e progresiva, na aprendizaxe do instrumento, así como para o seu posterior perfeccionamento; dividido en catro niveis, correspóndese cos catro cursos oficiais do Grao Elemental de Gaita Galega que se imparte nos conservatorios públicos de Galicia. Cada nivel consta de dez estudios e unha peza, o que conforma corenta estudios e catro obras en total.


Mais información.

Consellería de Educación e Ordenación Universitaria

Anuncios, subvencións, oposicións... / 23.02.06

Co fin de potenciar o funcionamento das escolas de música a Consellería de Educación e Ordenación Universitaria convoca axudas.

A orde do 6 de febreiro de 2006 está destinada a subvencionar o funcionamento, no desenvolvemento das súas actividades docentes, das escolas de música das asociacións ou fundacións sen ánimo de lucro que teñan entre os seus obxectivos a formación en ensinanzas de música e radiquen na Comunidade Autónoma de Galicia, desde o 1 de xaneiro de 2006 ata o prazo límite de xustificación de gastos. A cantidade concedida poderá acadar unha contía máxima por beneficiario de 4.000 euros.

Tamén foron publicadas sendas axudas para conservatorios e escolas de música de titularidade pública.


Mais información.

Crónica dunha adxudicación anunciada

Deput. Pontevedra / 21.02.06

A Deputación adxudícalle á Asociación Galega de Bandas de Gaitas a asistencia técnica para crear e xestionar unha escola provincial.

Hai máis de dous meses que a AGG advertiu do traxe feito á medida que levaba o concurso público convocado pola Deputación de Pontevedra para a creación dunha escola de gaitas e percusión na nosa provincia, á medida de Hipólito Cabezas, presidente da Asociación Galega de Bandas de Gaitas da Provincia de Pontevedra.

As nosas sospeitas confírmanse agora coa adxudicación do concurso. Dito fallo non supón ningunha sorpresa se temos en conta os criterios de avaliación tomados como referencia (nos que se primaba co 50% da nota un criterio tan subxectivo como é a orixinalidade dun proxecto, e tan só cun 15% da nota o profesorado incluído no proxecto…), así como a un xurado tan coñecedor e versado na música tradicional como o é o formado por D. Rafael Louzán e José Juan Durán, entre outros expertos…


Mais información.

Concerto de Gaideón en Vigo o luns 27 de febreiro ás 19:30

Concertos / 21.02.06



O vindeiro luns 27 de febreiro de 2006, a partir das 19:30 horas o grupo Gaideón (Coral Lago e Carlos Peixoto) realizará un concerto de antroido na praza da Constitución de Vigo. Colaboran o Concello de Vigo, a Agrupación de Centros Deportivos e Culturais, a Federación de Peñas Recreativas "El Olivo" e a Federación Veciñal "Eduardo Chao".

GAIDEÓN, nace como grupo na primavera do ano 2003, da man de dúas persoas experimentadas en diferentes formacións tradicionais galegas e, co compromiso único, de interpretar Música Tradicional de Galiza.
Como xeito expresivo, escollen a formación de “dúo”, coa intención de traballar nun dos xeitos de agrupación de músicos tradicionais galegos, que na actualidade vai a menos; pero tamén por ser unha formación que permite a interpretación musical dun xeito esencial, prescindindo conscientemente de máis ornamento instrumental.




Mais información.

Curso de Técnica de Interpretación de Gaita Galega

Cursos / 16.02.06

Os vindeiros días 18 e 19 de abril de 2006, no Conservatorio de Música de Ourense, terá lugar o

CURSO DE TÉCNICA E INTERPRETACIÓN DE GAITA GALEGA

impartido por

JUAN BARCÓN PEÑA
e
BRUNO VILLAMOR GAY

HORARIO DO CURSO: De 11:00 a 14:00 e de 16:00 a 22:00 horas (o horario pode sufrir modificacións en función da matrícula).

INFORMACIÓN
Secretaría do Curso
Rúa Pablo Iglesias, s/n
32004 – OURENSE
Teléfono: 988391047 – Fax: 988391971
E-mail: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo

Organiza: Conservatorio Prof. de Música de Ourense
Colabora: Asociación de Gaiteiros Galegos



Mais información.

Ide afinando as gaitas ... concurso de Ortigueira

Concursos e Certames / 15.02.06

O concurso celebrarase o vindeiro sábado día 13 de MAIO de 2006, ás 17,00 horas no “ TEATRO DA BENEFICENCIA , en Sta, Marta de Ortigueira , A Coruña.

Os grupos participantes deberán presentarse unha hora antes do concurso na Carpa da festa para facer un pequeno desfile ata o lugar do concurso.

Haberá unha única categoría para maiores de 15 anos, ou ben, que como moito un dos componentes do grupo sexa menor de esa idade.
Os premios serán os seguintes:
1º premio: 600€ e diploma.
2º premio: 300 € e diploma.
3º premio: 150 € e diploma.

Tódolos grupos participantes que non reciban premio recibirán un agasallo.

A data tope de inscripción será o sábado día 29 de abril.


Mais información.


Mala Herba en Pontevedra

Concertos / 14.02.06

O dúo Mala Herba, composto por Caetano Amenábar (zanfona) e Serxio Cobos (acordeón), ofrecerán o seu novo espectáculo o xoves día 16 de febreiro a partir das once da noite no local Lusco e Fusco, na rúa Barón da zona vella de Pontevedra.

A peculiar parella musical sorprenderanos cun repertorio zarrapicado de melodías innovadoras pero conectadas co pasado que nos transportarán a tempos e lugares xa vividos mais aínda por vir, en calquera caso, tempos e lugares oníricos e moito mellores.

Non deixedes de asistir.

Xuntanza Música Tradicional do Salnés

Festivais, Foliadas, Romarías / 12.02.06



O vindeiro venres 17, a partir das 10 da noite na cafetaría Vila Aurora da praia Compostela, celebrarase a segunda xuntanza da música tradicional da comarca do Salnés. Despois do éxito da xuntanza do mes de xaneiro os músicos tradicionais da comarca decidimos establecer de maneira formal esta convocatoria co ánimo de que sirva de punto de encontro e relación entre tódalas persoas que teñen un vínculo directo coa música tradicional, así como de todos aqueles que queiran achegarse a este tipo de música e disfrutar dunha boa noite.


Mais información.

Páxina 389 de 404