Asociacion de Gaiteiros Galegos

Gaiteiros galegos
Inicio / Novas

Novas

Comunicado do Colectivo en Defensa da Gaita

CDG / 06.09.06

O engano político das gaitas

Recentemente a banda de gaitas Nova Fronteira & Cartelle (Ourense) foi proclamada a mellor banda de gaitas de Galicia. Vivimos nun país cheo de contradiccións e curiosidades que o Colectivo en Defensa da Gaita (CDG) nunca poderá comprender. Unha banda que desfila con gaitas marciais, percusión de alta tensión e faldas (elementos inspirados e copiados das bandas escocesas) non pode representar ós galegos. Algúns políticos desta terra (do novo goberno PSOE-BNG) presumen de defende-los valores musicais e culturais galegos, sen percatarse do que verdadeiramente está a acontecer no noso país no tocante ás bandas de gaitas. Outros, como a alcaldesa de Vigo Dona Corina Porro, incumplen promesas de facer respeta-la nosa música. Na TVG continúan retransmitindo encontros multitudinarios de gaiteiros, que semellan máis escoceses que galegos, co beneplácito gubernamental e financiados con cartos públicos de todos nós. Nas fases desa Liga de Bandas de Gaitas continúan asistindo representantes do IGAEM (dependente da Consellería de Cultura e Deporte da Xunta de Galicia) para facerse a foto de costume. En Pontevedra xurde unha rede de escolas, financiada pola Deputación Provincial, que fomenta a creación de bandas de gaitas pro-escocesas. E isto semella non importarlle a ninguén. Aparentar normalidade para conseguir votos é enganar á xente. E é unha vergoña que os representantes políticos do noso país non teñan a suficiente convicción para facer o que realmente teñen que facer. Son moitas as palabras pero poucos os feitos. E a esperanza do cambio político para o cambio musical é sinónimo do desánimo que actualmente sinte o CDG coas cousas que están a acontecer. Ir máis aló deste problema non é sinxelo, pero tampouco é tan complicado. Vontade e espírito de loita. Sen isto nunca faremos nada. E se nós mesmos non somos capaces de apreciar a riqueza cultural que temos sen recurrir a modelos musicais foráneos nunca poderemos dignifica-la nosa música como se merece. E tódalas bandas de gaitas que copian directamente elementos importados de Escocia nunca poderán ser galegas nin representar a Galicia. Por moito que nos queiran convencer algúns iluminados. Só pedimos unha cousa: respeto. Para a nosa música e para a nosa terra.

Colectivo en Defensa da Gaita. A Coruña

En representación do CDG:

RICARDO CASÁS SALGADO D.N.I. 53.162.745 - Q
LUIS GARCÍA CORRAL D.N.I. 53.163.859 – A
RAMÓN RODRÍGUEZ PALLEIRO D.N.I. 47.368.388 - A

**ESTUDIOS PARA GAITA GALEGA** - VOL I - Nivel Iniciación

Publicacións / 02.09.06

A editorial Dos Acordes vén de publicar o primeiro volume dunha serie de obras da autoría de Xosé Lois Miguélez Saínza.

Eis a publicidade da propia editora:

Comeza o curso cunha nova publicación que che axudará na aprendizaxe do instrumento dun xeito ameno e progresivo.

Dispoñible nas librerías, tendas de música ou directamente na web www.dosacordes.com na sección -publicaciones- dentro da serie "Cadernos de Gaita Galega".

Podes elixir o teu sistema de escritura máis familiar Do ou Re, actualizar os estudios e descargarte gravacións dos mesmos na web do autor www.xlmiguelez.com (a partires de outubro 06)

O mestre de Gaita atopará neste libro unha útil ferramenta para complementar as súas aulas.

MERCAO XA!!

**O VOLUME II - Nivel medio, estará á venta a partires do mes de novembro de 2006**

Atentamente, Editorial Dos Acordes www.dosacordes.com

Resultados do XVI Contantino Bellón 2006

Concursos e Certames / 01.09.06

O renovado Teatro Jofre de Ferrol foi escenario onte, 31 de agosto, do XVI Constantino Bellón que foi conquistado, por terceira vez xa, por Daniel Bellón, igualando, deste xeito o record de Pepe Vaamonde. Os dous accesits de 600 euros cada un foron para o ourensan Pablo Devigo e para o lugués Bruno Villamor malia ter, este último, que cambiar de pallón na metade da súa actuación.
A mención especial 'Gaita de ouro' foi entregada a Alvaro Seivane Magide. A de prata, que estaba concedida a Milladoiro, non foi recollida no acto dado que o grupo atópase de xira. Concedeuse unha medalla de prata, a título póstumo, a Manuel García Pereira 'Lolete', que foi recollida e agradecida polos seus fillos.
A peza 'Amencer en Fisterra' acadou o premio de composición que recolleu o seu autor Ernesto Campos.
Resultou, coma sempre, unha velada plena de gaita e reencontros que demostrou que o do Teatro Jofre é o esceario ideal para este evento.

Programa Constantino Bellón 2006

Concursos e Certames / 29.08.06

PROGRAMA A DESENVOLVER CON MOTIVO DA CELEBRACIÓN DO XVI CONCURSO DE GAITA GALEGA “CONSTANTINO BELLÓN”

DÍAS 30 e 31 de AGOSTO de 2006
no TEATRO JOFRE ás 20,30 horas



Mais información.

MENCIÓNS GAITA DE OURO e GAITA DE PRATA do XVI CONCURSO DE GAITA GALEGA "CONSTAN

Concursos e Certames / 25.08.06

émolo pracer de comunicar o acordo tomado en Xunta Directiva, referente á Institución das Mencións Honoríficas do Ateneo Ferrolán, nas dúas modalidades de Gaita de Ouro e Gaita de Prata “Constantino Bellón” e a concesión das mesmas, motivo polo cal facémoslle chega-la comunicación e as nosas felicitacións en nome de tódolos compoñentes desta Directiva.

A imposición das citadas Mencións terá lugar no ACTO que se celebrará o próximo xoves día 31 de agosto, as 20,30 horas, no Teatro JOFRE de Ferrol na Final do XVI Concurso de Gaita Galega “Constantino Bellón”,.

O Ateneo Ferrolán ACORDA concede-las Mencións de Gaita “Constantino Bellón” correspondentes ao ano 2006 a:

1) Gaita de Prata
O Ateneo Ferrolán quere render un recoñecemento, concedendo a Gaita de Prata “Constantino Bellón 2006”, ao grupo MILLADOIRO polo seu papel na divulgación e no ensino da música tradicional galega.

2) Gaita de Ouro
O Ateneo Ferrolán acorda concede-la Gaita de Ouro “Constantino Bellón 2006”, a persoa de ALVARO SEIVANE MASIDE como artesán e pola continuidade familiar a prol da música tradicional galega.

Así mesmo, ACORDAN condeder a GAITA DE PRATA a título póstumo e de manera especial, a MANUEL GARCÍA PEREIRA, LOLETE, como recoñecemento a súa valía profesional e humana.

ACTOS DO XVI CONCURSO DE GAITA GALEGA "CONSTANTINO BELLÓN"

Concursos e Certames / 24.08.06

O Ateneo Ferrolán comprácese en convidarlle aos actos do XVI Concurso de Gaita Galega “CONSTANTINO BELLÓN”

Data: MÉRCORES día 30 de agosto de 2006
Estreno PEZAS gañadoras do Premio de Composición

Data: XOVES día 31 de agosto de 2006
FINAL do XVI Concurso de Gaita Galega Constantino Bellón

HORARIOS: 8,30 tarde. LUGAR: Teatro JOFRE - Ferrol.

Noites máxicas e Vigo, as noites dos Iluminados.

AGG / 22.08.06

Noites máxicas e Vigo, as noites dos Iluminados.

240.000 euros das arcas públicas van ser, de novo, dilapidados nun espectáculo pretencioso e carente de todo sentido que pretende, pero non ten nada ten que ver coa cultura da nosa terra. Segundo o Sr. Hipólito Cabezas, representante da empresa produtora e triste artífice do atentado á cultura galega da Asociación de Bandas de Gaitas de la Provincia de Pontevedra, este será un espectáculo feito en Galicia para a súa exportación. Como sempre, a mediocridade deste elemento intenta disimular, no seu discurso fatuo e grandilocuente, a súa completa carencia de imaxinación para crear algo orixinal. Tanto é así, que non lle chega con copiar o formato, senón tamén o nome das coñecidísimas 'Noites Máxicas' que se celebran tódolos anos durante o Festival Intercéltico de Lorient (Francia). O máis triste do caso é que a corporación municipal de Vigo se deixe enganar e trague esas rodas de muiño que, a prezo de ouro, lle serve o Sr. Cabezas.

Como o lector recordará, hai algúns meses, a Excma. Deputación de Pontevedra concedía ao Sr. Cabezas 100.000 euros para a creación de cinco escolas de gaitas coa oposición de tódolos colectivos dedicados á música tradicional da Provincia. Máis de 12500 sinaturas foron presentadas no rexistro do organismo provincial sin que surtiran efecto algún. Nun espectáculo celebrado no teatro García Barbón no que se presentaba a Agrupación de Gaitas 'Moxenas', a Sra. alcaldesa, Dona Corina Porro, prometeu que Vigo non se prestaría ao xogo da suplantación das nosas tradicións por formas e músicas alleas. Pois ben, velaquí temos o resultado: a celebración nestas 'Noites Máxicas' dun campeonato de Bandas de Gaitas con formato Escocés, formacións e círculos concéntricos incluídos.

A Asociación de Gaiteiros Galegos quere denunciar e deixar patente a súa disconformidade e repulsa polo apoio do Concello de Vigo e a Deputación a este tipo de manifestacións que non fan outra cousa máis que asasinar a nosa música tradicional e importar instrumentos, técnicas e formas que non teñen nada que ver con Galicia. Os iluminados e acomplexados que as defenden deberían de pulsar opinións neses paises aos que tratan de imitar e que están a valorar, cada vez máis, a nosa música de raiz tal como sempre foi. As adulteracións só serven para provocar un sorriso de condescendencia tando dentro como fóra de Galicia.

FALLO DO XURADO AO PREMIO COMPOSICIÓN PARA GAITA GALEGA SOLISTA- XVI CONCURSO DE

Concursos e Certames / 22.08.06

En Ferrol, o día 21 de agosto de 2006, no local do Ateneo Ferrolán, sito na rúa Magdalena 202-204, o XURADO do XVI Concurso de Gaita Galega “CONSTANTINO BELLÓN”, composto por:

D. Víctor Fernández Gabeiras
D. Xavier Rodríguez Fariñas
D. Pablo López Torneiro
D. Xoán Rodríguez Silvar
D. Xesús Vaamonde Manteiga

e actuando como secretaria, sen voto, Dona María Cristina Meizoso Alonso, unha vez analizadas a totalidade das composicións presentadas ó mesmo,

ACORDOU, entregar ó PREMIO de Composición para Gaita Galega Solista a:

ERNESTO CAMPOS CAMESELLA

pola partitura para Gaita e Piano “AMENCER EN FISTERRA”

Novo espectáculo etnográfico do Grupo de Música e Baile Tradicional Xacarandaina

Festivais, Foliadas, Romarías / 22.08.06



A estrea do novo espectáculo etnográfico do Grupo de Música e Baile Tradicional Xacarandaina "PRESTIXIO" terá lugar o vindeiro venres 25 de agosto ás 22:30 na Praza do Convento de Pontedeume, tendo a súa continuación o sábado 26 de agosto ás 22:30 na Praza dos Libros de Carballo, o venres 1 de setembro en Dodro e o sábado 2 de setembro en Soutomaior.


Mais información.

A música do país, contra o terrorismo incendiario, viste de negro

Varios / 11.08.06

A música do país, contra o terrorismo incendiario, viste de negro

A través desta iniciativa a Asociación de Gaiteiros Galegos quere expresar a súa indignación e rexeitamento contra a actividade incendiaría que está a sufrir o país nestes últimos días.

Sabemos que moitos dos nosos socios están a traballar na medida das súas posibilidades en tarefas de colaboración. Máis aínda, moitas festas terán que ser canceladas. Aínda así, se nesta ponte, a máis festeira do ano, do 12 ao 15 de agosto, vas tocar, cantar, bailar, ... vístete de negro. Deste xeito o colectivo de músic@s e artistas manifestaremos a nosa adhesión coas víctimas do lume, cos traballadores que están a loitar de xeito valente e incansable. Formaremos parte, como sempre fixemos, do movemento social de rexeitamento contra este novo atentado que esta a sufrir o país.

Difunde esta mensaxe. Entre tod@s faremos chegar a todas as vilas, aldeas e cidades esta mensaxe de indiganción e rexeitamento.

Asociación de Gaiteiros Galegos.
Rúa Afonso XIII,7, oficina 8 - 36.002 Pontevedra
Tfno: 986 84 70 74
www.gaiteirosgalegos.com

Páxina 384 de 408