Asociacion de Gaiteiros Galegos

Gaiteiros galegos
Inicio / Novas / Lume na Palleira

Lume na Palleira

PROXECTO RONSEL

19.10.07

O Sábado 20 de outubro en "Lume na Palleira" poderemos escoitar unha nova edición do espazo "O recuncho da Palleta" no que colabora a Asociación de Gaiteiros Galegos. Nesta ocasión, Pablo Carpintero será o encargado de traernos novas sobre varios proxectos que se están a levar a cabo en defensa da cultura e tradición Galega.

O Proxecto Ronsel, promovido polas tres Universidades de Galicia e a Xunta de Galicia, na procura da recuperación do patrimonio inmaterial galego, e a Mostra de Patrimonio Inmaterial Galego-Portugués que se celebrará do 7 ao 11 de novembro na Praza da Ferrería en Pontevedra.


Non vos perdades a emisión deste sábado de "Lume na Palleira", de 16:00 a 18:00 h. en "RADIO GALEGA MÚSICA", con emisión conxunta de 16:05 a 17:00 na "RADIO GALEGA".
   

PRESENTACIÓN DO CANCIONEIRO GALEGO DE TORNER E BAL Y GAY

11.10.07

O sábado 13 de Outubro, no programa “Lume na Palleira”, terá lugar a presentación da reedición dun dos máis grandes cancioneiros galegos, o Cancioneiro de Torner e Bal y Gay, levada a cabo pola Fundación Pedro Barrié da Maza.

Nesta ocasión, será o catedrático de Música da Universidade de Santiago e autor do estudo científico que deu froito ao tomo do "Cancionero gallego", Carlos Villanueva, o encargado de realizar a presentación. O experto cualificou á iniciativa como un "acerto editorial" posto que se trata dun "material do que non existen antecedentes históricos e que permite unha volta neotradicionalista ao pasado de Galicia”.

O "Cancionero Gallego" supón un importante traballo de investigación e recompilación de arredor de 1.300 melodías da música tradicional de Galicia, na súa meirande parte inéditas, escritas en galego e castelán.

As composicións foron reunidas entre 1928 e 1932 polo musicólogo Jesús Bal y Gay en colaboración co investigador Eduardo Martínez Torner.

Pero teredes ocasión de coñecer máis detalles do Cancioneiro o sábado, de 16:00 a 18:00 h. en "RADIO GALEGA MÚSICA", con emisión conxunta de 16:05 a 17:00 na "RADIO GALEGA". Non vos esquezades.
   

O GRUPO "TROULA" DE MADRID

05.10.07

O sábado 6 de Outubro compartiremos o "recuncho da palleta" co grupo Troula de Madrid. Este grupo é un exemplo paradigmático da importancia histórica da música patrimonial galega na emigración, neste caso dentro do Estado español.

O seu funcionamento durante unha década na que amenizaba festas de todo tipo en Madrid e arredores, a participación no grupo de xente significativa da música tradicional galega, que estudiaba ou traballaba neses tempos na capital, e a súa gravación(inédita) xunto coa participación estelar nun programa televisivo de ámbito nacional no ano 1991, serven de excusa perfecta para recuperar para a memoria colectiva este grupo, en representación seguramente de multitude de grupos inéditos que mantiveron a Galicia cultural viva a pesares da distancia.

No programa do día seis haberá entrevistas con moitos membros do grupo,audicións inéditas e algunha sorpresa...

Lembrade ademais que os novos horarios do programa Lume na Palleira son:

-Os sábados de 16:00 a 18:00 na RADIO GALEGA MÚSICA con emisión conxunta de 16:05 a 17:00 na RADIO GALEGA
-Os domingos de 15:00 a 16:00 na RADIO GALEGA MÚSICA
   

COMEZA UNHA NOVA TEMPADA DE "LUME NA PALLEIRA"

21.09.07


O sábado 22 de Setembro comezou unha nova etapa de “Lume na Palleira”, o programa da Radio Galega dirixido e presentado por Emilio Españadero Paz. A partir das 16:00 horas, esta proposta musical alternativa dentro das ondas radiofónicas, continuará dando a presencia que se merece a nosa música folk e tradicional.

Neste primeiro programa, entre outros, acompañounos Xaneco Tubío, membro da Xunta Directiva da Asociación de Gaiteiros Galegos, para falarnos das "Xornadas sobre o Réxime Xurídico e Fiscal para Actividades Artísticas" que se van a celebrar o vindeiro sábado, 29 de Setembro, cun horario de 10:00 a 14:00 horas, en Santiago de Compostela.

Estas xornadas, organizadas pola AGG, serán impartidas por persoal da empresa "Algalia", profesionais cunha dilatada traxectoria no asociacionismo e con procedencia do ámbito da xestión e da formación.

Música en directo, XIX Xuntanza de Gaiteiros, presentación das novedades musicais, todo esto e mais, na nova andaina de “Lume na Palleira”. Esperamos contar de novo con todos vos.
   

DESCANSO DOS RECUNCHOS ATA SETEMBRO

29.06.07

Durante os meses de Xullo e Agosto vaise a facer un pequeno parón na emisión dos "recunchos da palleta" posto que como todos sabedes, estamos en periodo de vacacións e na radio tamén necesitan un descanso.

"Lume Na Palleira" naceu como unha proposta musical alternativa dentro das ondas radiofónicas da Radio Galega, tratando de que a música folk e tradicional, tanto do noso país como de outros (principalmente os de influencia céltica), tivera presencia a traveso de ditas ondas. Coa sección dos "recunchos da palleta" tratamos aportar algunha axuda a todos aqueles interesados pola música tradicional que teñen interese en ampliar os seus coñecementos sobre a nosa cultura.

Nos últimos meses tratáronse temas tan interesantes como a historia de "Os Terribles de Donas" e Paco, o gaiteiro de Escornabois. Tamén falouse do Memorial Manuel Texo, de "Os Peruchos de Castrelos" e incluso fíxose un programa especial en directo de "Lume na Palleira" adicado o "I Encontro deTocadores de Trompa" que tivo lugar na Fonsagrada o 21 de Abril.

Estes meses de verán servirán para recopilar información e voltar en Setembro con novos temas cos que de seguro seguiremos coñecendo mellor a música tradicional galega. Esperamos contar con vos na vindeira tempada.
   

AS GAITAS DE ALCACÉN

15.06.07


O Sábado 16 de Xuño, Pablo Carpintero tratou un tema moi interesante nos recunchos da palleta: as gaitas de alcacén.

Trátase dun tipo de clarinete, que xunto con outros instrumentos fabricados con pallas de centeo, avea ou trigo, aparece por toda Galicia. Son instrumentos que serviron para a aprendizaxe de multitude de vellos gaiteiros e a maioría deles todavía sabe como fabricalos e tocalos.

As pipas de alcacén son quen de reproducir, se son fabricadas coa suficiente destreza, calquera tipo de melodía propia das gaitas de fol ou do canto tradicional. E ademais son con estes sinxelos instrumentos cos que a maior parte dos nosos vellos gaiteiros comezaron a tocar. Pero de todo este tema, ninguén mellor que Pablo Carpintero para darnos mais información nos recunchos.
   

PACO, O GAITEIRO DE ESCORNABOIS

08.06.07


O Sábado 9 de Xuño, Pablo Carpintero compartiu a sección dos recunchos da palleta co gaiteiro de Escornabois, Paco, un grande gaiteiro de case 80 anos, da Limia, da Aldea de Escornabois.

Paco, que ven de publicar un disco con Edicións do Cumio producido por Pablo Carpintero, é probablemente un dos gaiteiros máis recoñecidos de Galicia.O seu peculiar xeito de mover os dedos sobre o punteiro, os seus picados e repicados, atraen ós músicos máis novos que intentan imitar as súas características ornamentais. Ademais é un mestre cun repertorio interminable, que acode todos os anos ó Entroido de Laza para animar esta festa ancestral co son da súa gaita .

Nos recunchos estivemos toda a hora conversando e tocando con el para coñecer mellor a esta figura tan importante da nosa música tradicional.
   

INÉDITOS III- "OS TERRIBLES DE DONAS"

01.06.07


O Sábado 2 de Xuño, no espacio "o recuncho da palleta" e da man de Xaime Estévez, tivemos a oportunidade de coñecer a "OS TERRIBLES DE DONAS" grupo histórico do Val Miñor que na actualidade volve con forza da man dos fillos e netos dos fundadores que están recuperando as pezas propias do grupo e preparando unha posible gravación das mesmas.

No programa tivemos ocasión de falar cos herdeiros naturais do grupo e actuais compoñentes : Manolo,Suso,Verónica e Xurxo e ademáis tivo lugar unha actuación en directo no propio recuncho con repertorio inédito e orixinal deste grupo.
   

MEMORIAL MANUEL TEXO

04.05.07



O sábado 5 de Maio, nos recunchos da palleta contamos con Xosé F. Gil Dopazo para falarnos do Memorial Manuel Texo que este ano cumpriu o X aniversario.

Este Memorial é unha homenaxe á figura do gaiteiro Manuel Texo, un home que desde sempre foi defensor da música tradicional galega. Foi membro do grupo "As Requintas de Santa Cruz de Rivadulla" ademais de ser moi importante a súa aportación á conservación e recuperación de pezas de música tradicional.

Este certame, estase a converter nun referente dentro dos concursos de quintetos e cuartetos en toda a Comunidade Autónoma.
   

INÉDITOS II : OS PERUCHOS DE CASTRELOS

27.04.07



O recuncho do día 28 contou coa presencia extraordinaria de Antonio e Alejandro García Vila e Beatriz Riobó. Eles vannos a descobrir ós PERUCHOS DE CASTRELOS(VIGO) grupo histórico coetáneo dos Morenos de Lavadores e dos Campaneiros, pero con antecedentes familiares que se perden máis atrás.

INÉDITOS II adícalles este recuncho no que se porán versións gravadas por outros grupos do seu repertorio e contaremos en direto cas testemuñas dos Propios Peruchos e de Beatriz Riobó profesora do Conservatorio Superior de Vigo, Gaiteira e "Perucha" que investiga este capítulo tan interesante como pouco coñecido dun grupo que presumía de ser mellor que os seus coetáneos para nos polo de agora máis famosos.
   

Páxina 6 de 8