Asociacion de Gaiteiros Galegos

Gaiteiros galegos
Inicio / Novas / Varios

Varios

RUADA EN SANTAIA DE GORGULLOS

24.12.08

A Asociación Cultural Brisas do Quenllo, coa colaboración do Bar Becerra, organiza este venres día 26 de decembro unha ruada en Santaia de Gorgullos (concello de Tordoia).

Nesta ruada daráselle unha merecida homenaxe a "Flor da Maquía", o señor Florentino, un gaiteiro de 80 anos,moi ben levados, que dende moi novo percorreu as terras da comarca de Ordes coa súa gaita en varios cuartetos ilustres do lugar. Hoxe conserva un repertorio amplísimo e unha dixitación propia da zona, do que nos dará conta. A parte de ser unha persoa entrañable mantén un amor pola gaita impresionante, cabe destacar que por problemas de saude, non pode soprar, polo que se inxeniou mediante un barquín de pé para poder seguir tocando sen forzar os pulmóns.

Acompañarán tamén nesta ruada os Panxoleiros de Santaia (Tordoia), o grupo Maghúa (Coruña), Pandereteiras Bouba (Tordoia), os vellos pandereteiros e bailadores da comarca... Prégase a todo músico interesado que traia instrumento, pois haberá un oco para todos e cada un dos que queiran botar unha peza.

Celebrarase no Bar Becerra, en Santaia (Concello de Tordoia), comezará ás 22:00 horas, e rematará cando o corpo non poida máis. Quedades todos convidados.
   

SETIMAS NOITES DE TASCA

23.12.08





O próximo venres 26 de Decembro, a partires das 21 h., celebraranse as Sétimas Noites de Tasca no Bar Calviño en Pontepedra (Tordoira). Esta xornada, organizada pola Asociación Grupo de Gaitas Os Viqueiras de Ordes, contará coa presenza de Os Receiros de Ponte Carreira (Frades), os Panxoleiros de Santaia e os Vellos Pandereteiros e Bailadores de Tordoia.
A organización estende unha cordial invitación para todas aquelas persoas ás que lles apeteza ir tocar con eles; ademais, os participantes recibirán un agasallo.



   

SUSANA SEIVANE RECIBE O PREMIO XARMENTA

18.12.08







Un ano máis, a Asociación Berciana da Lingua Xarmenta, que promociona o uso do galego na comarca leonesa do Bierzo, presentou, o día 14 de Decembro, aos gañadores do premio que leva o nome da asociación.

Nesta ocasión, o galardón na categoría de Personalidade recaeu na gaiteira Susana Seivane, por ser, segundo palabras da organización, unha gran difusora do idioma galego. O xurado destacou a súa querenza pola lingua, que leva polos escenarios de medio mundo na súa traxectoria artística.

‘Vivo en galego, falo en galego e exprésome en galego’, asegurou Seivane, unha moza que, aínda nacendo en Barcelona, conserva as tradicións dos seus antepasados, entre as que se atopa a construción de gaitas; clara influencia para a artista, que toca este instrumento dende os catro anos.


   

XXI XORNADAS DA GAITA NO ATENEO FERROLÁN

17.12.08

O Ateneo Ferrolán dentro das súas actividades de promoción da música galega ven propiciando e celebrando, case continuo, tódolos anos (dende hai 20 anos) unhas Xornadas de Gaita, como un lugar de encontro para grupos ou xentes que utilizan a gaita como un dos instrumentos básicos nas súas actuacións e composicións.
Unha das súas características específicas é a participación de grupos de música folk galega, xunto con algún autor ou grupo invitado de fora de Galicia pero, que teñan tamén na súa estrutura de acompañamento a gaita como un elemento indispensable, servindo así de contraste e comparación da nosa música coa doutras culturas e músicas afíns.
Nestas XXI Xornadas da Gaita participarán a Banda de Gaitas Agarimo, Vaamonde, Lamas & Romero, e Roncos do Diabo.

19 e 20 de Decembro no Ateneo Ferrolán ás 20:30 h. Entrada libre e gratuíta..

Venres 19: BANDA DE GAITAS 'AGARIMO' (Ferrol) e 'RONCOS DO DIABO' (Portugal)
Sábado día 20: 'TRÍO VAAMONDE, LAMAS & ROMERO' (Galiza)
   

SON DA LÚA MEIGA

17.12.08

Tentando que a música tradicional, o folk e a música en galego feita en Galicia non sexa un fenómeno cultural estacional ligado ós festivais de verán, e buscando que a música galega forme parte dos momentos de esparcemento de todos os estamentos sociais, celebramos o “Son da Lúa Meiga”, unha continuación do Festival da Noite da Lúa Meiga celebrada no Viso (Concello de Redondela), donde se pretende potenciar a novos talentos da música galega, principalmente no eido tradicional e folk. Contarase con grupos noveis da comarca e da provincia facilitándolles así un escaparate para amosar as súas pezas e as súas interpretacións musicais. Favorecerase tamén que os artistas conflúan nas súas actuacións facendo un final de festa donde colaboren de xeito improvisado dando renda solta á súa creatividade e facendo que os presentes tamén poidan participar subindo ó escenario.

Son da Lúa Meiga é tamén unha xuntanza da xente que vive e enreda no seu tempo de lecer coa música tradicional galega, buscando unha noite donde predomine a festa, donde grandes e pequenos poidan xuntarse a botarlle unhas muiñeiras ou uns agarrados, donde todos nos identifiquemos coa nosa música tradicional en galego.
Celebrarase o sábado 20 de Decembro a partir das 21:30h na Casa do Pobo do Val-Sobral (Soutomaior).

Como non, estades todos convidados e seguro que valerá a pena acercarse pois esperamos montar unha boa Festa Rachada.

Actuarán:
- TRES ESTRALOS
- TANTO NOS TEN
- REGUEIFEIROS TRIOLIRO
Despois, todos aqueles que queiran tocar poderán facer toda a festa que queiran.
   

Actividades de Nadal - Rebulir

16.12.08

A Escola de Baile e Música Tradicional REBULIR ven de presentar o seu programa de actividades para o vindeiro mes de Nadal. A máis destacada será o III Festival de Baile e Música Tradicional Rebulir, que se desenvolverá o día 20 de Decembro, as 19:00 h no Polideportivo de O Picouto contando con grupos de toda Galicia e algún de Portugal.
Este programa seguirá o Sábado día 27, cun obradoiro de Xogos Bailados, dirixido a xente de todas as idades. A cita será as 17:00 h no local de Rebulir situado na Praza de San Andrés – Vilavidal.
Continuando co mesmo o Sábado 3 de Xaneiro teremos a Inauguración da Exposición “Os tempos de antes. Fotografías Antigas do Concello de Ramirás” no Centro Sociocultural de O Picouto, este acto comezará as 18:00h.

Seguindo a ideoloxía da Asociación, ningún dos actos suporá custe algún para os asistentes, xa que a finalidade é facer extensible a cultura a todo o mundo, sen ter que pagar por acceder a mesma.

A continuación exponse un cadro resumo co calendario destas actividades:

- Sábado, Día 20 de Decembro – III Festival de Baile e Música Tradicional Rebulir, as 19:00 h no Polideportivo de O Picouto, con grupos de Galicia e Portugal.

- Sábado, Día 27 de Decembro – Obradoiro de Xogos Bailados no Local de Rebulir, as 17:00 h

- Sábado, Día 3 de Xaneiro – Inauguración da Exposición “Os tempos de antes. Fotografías Antigas do Concello de Ramirás”. As 18:00 h no Centro Sociocultural de O Picouto.
   

V Día do Orgullo Gaiteiro

04.12.08

O sábado 13 de decembro, a AOFT-Gomes Mouro, en colaboración coa Tenencia de Alcaldía do concello de Ourense, o Auditorio municipal de Ourense, La Caixa e a Radio Galega, organiza o "V Dia do Orgullo Gaiteiro". Será na sala anexa do Auditorio municipal de Ourense.

Esta edición do Dia do Orgullo Gaiteiro está dedicada en homenaxe a Ermelinda Seguín Matías "Ermelinda do Muiño", de Sarreaus. Na mesma entregaráse o premio novas Iniciativas ao Proxecto Ronsel, que en recentes datas celebrou a Mostra de Patrimonio Cultural Inmaterial na capital das burgas, actividade na que colaborou a Asociación de Gaiteiros Galegos.

O programa completo da xornada inclúe charlas, obradoiros, concertos e rematará cunha cea de confraternización á que se poderá asistir previa reserva de praza.

PROGRAMA

-16:00 a 18:00 Emisión de Lume na Palleira en directo con Emilio Españadero
-18:15: a 19:00 Charla didáctica e audicións "O Acordeón diatónico na Galiza" con Félix Cástro e Xoán Pedro Blanco.
-19:00 a 19:30 Acto Homenaxe: a "Ermelinda Seguín Matías", cantareira de Sarreaus, e Premio novas iniciativas o "Proxecto Ronsel" de salvagarda e Posta en valor do patrimonio Cultural Inmaterial de Galicia.
-19:30 a 20:00 Antón Castro, "De Contar e de Cantar"
-20:00 a 21:00 Actuación do Grupo "Tanto nos Ten"

As 21:30 Cea do Orgullo no Restaurante Oira Praia, (estrada de Oira nº 20) Precio da Cea 18€, (15€ para Alumnos e asociados da AOFT). Apuntarse antes do martes 9 de decembro, inclusive, no teléfono 654173524.
   

Cultur.gal 08

27.11.08

O Cultur.gal 08, Feira Galega das Industrias Culturais, terá lugar en Palexco, A Coruña, do xoves 4 ao domingo 7 de decembro. Esta é a súa segunda edición (o ano pasado celebrouse en Pontevedra) mais esta é a primeira vez que conta cunha ampla representación dos sectores produtivos da cultura galega: literatura, audiovisual, artes escénicas, música e novas tecnoloxías. De entre todos eles, a música vai ter unha destacada presenza. Non só haberá stands de empresas musicais, senón que haberá 15 showcases que ofrecerán as últimas novidades da música galega e un espectáculo musical, o "Music.gal" que constitúe un dos pratos fortes da Feira, ademais dun CD promocional da música galega que se distribuirá por todo o país na campaña de Nadal.

O Cultur.gal acollerá tamén as II Xornadas da Industria Musical Galega. Unhas xornadas que dan continuidade ás que se celebraran o ano pasado no Auditorio de Galiza. Daquela o público asistente ratificara nas enquisas de opinión a necesidade unánime deste tipo de encontros que lle permitan ao sector manterse ao día ao tempo que se interrelacionan e debaten. A organización desta segunda edición correu a cargo das asociacións do sector, AGEM e AGAPHONO e, ademais de conferencias e mesas redondas, ofrecerán a posibilidade de participar nun par de "meeting points" para interaccionar directamente cos conferenciantes das xornadas.

O prazo para a inscrición nas xornadas (de entrada gratuíta mais previa inscrición) remata o próximo domingo día 30.


Información e inscrición na seguinte ligazón: http://www.culturgal.com/actividade.php?id_a=10
   

VI encontro de pandeireta galega e asturiana

17.11.08

O sábado 29 de Novembro celébrase en Sabucedo (A Estrada) o VI encontro de pandeireta galega e asturiana. O programa inclúe actuacións, cea de confraternización, foliada e a posibilidade de reservar aloxamento no albergue de Sabucedo.

PROGRAMA

20:30 Recibimento no albergue de Sabucedo.

21:30 Cea de confraternización.

23:30 Actuacións: "Pandereteres de Fitoria" e "Os muiños de Oliveira", seguido de festa aberta á participación dos presentes.

Para asistir ao Encontro é precisa unha inscrición previa, xa que as prazas son limitadas. O prezo por persoa é de 25€ coa cea incluída ou de 40€ con cea, aloxamento e almorzo no albergue. Para máis información e inscricións poñerse en contacto coa organización a través do enderezo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo
   

MAGOSTO EN CASTRELO DO VAL

13.11.08





O sábado 15 de novembro de 2008 no Campo da festa de O Terrón en Castrelo do Val.
A partir das 12h Campionato de Xogos Populares
con agasallos para tod@s @s participantes.
A partir das 18h Magosto Popular
con castañas, chourizos asados, viño e gran queimada final.





   

Páxina 226 de 237