Asociacion de Gaiteiros Galegos

Gaiteiros galegos
Inicio / Novas / Varios

Varios

Oitavas noites de tasca

22.01.09







Seguindo coas Noites de Tasca que ven organizando a Asociación Grupo de Gaitas Os Viqueiras de Ordes, esta iniciativa chega á súa oitava edición, que se celebrará o venres 30 de xaneiro de 2009 a partires das 9 da noite no Bar Zapateiro de Senra-Oroso.

As Oitavas Noites de Tasca contarán coa presenza de Enrique Carregal, gaiteiro de Melide, ea Agrupación Folclórica de Baile e Música Tradicional Buxos Verdes.

A organización invita a tódolos interesados a asistir e tocar, e recorda que tódolos participantes recibirán un agasallo.
   

Conferencia POLOS CAMIÑOS DA MÚSICA TRADICIONAL

20.01.09


O vindeiro venres 23 de Xaneiro ás 20.00h terá lugar, no Centro Sociocultural do Castiñeiriño, a conferencia Polos Camiños da Música Tradicional impartida por Mini e Mero, mestres no rural, cofundadores de “Fuxan os Ventos”, fundadores de “A Quenlla”, musicólogos, intérpretes, autores de libros como “Contos de Vellos para nenos”, “Somos Lenda Viva”, etc., e asiduos participantes de conferencias, exposicións e obradoiros.


Quedades convidados a asistir; de seguro non vos arrepentiredes.


Centro Sociocultural do Castiñeiriño:
Virxe de Fátima, s/n.
Santiago de Compostela
   

SOBRE A VISITA DO VICEPRESIDENTE Á TRADESCOLA

19.01.09

Na súa visita ás instalacións do complexo residencial xuvenil Lug, o Vicepresidente da Xunta salientou que o amplo abano de actividades que se ofertan neste centro é posible grazas á colaboración entre a Vicepresidencia e a Consellería de Innovación e Industria, que financiou os equipos e as instalacións da área de novas tecnoloxías. Tamén destacou a colaboración da Deputación de Lugo para a posta en marcha da Escola de Música Tradicional Galega, Tradescola, a través da que se está a promover a música tradicional galega. Neste senso, o centro representa, segundo Anxo Quintana, "o noso modelo de política de xuventude e o noso xeito de facer as cousas, a través da colaboración institucional que permite sumar esforzos en beneficio da sociedade".

Texto extraído da web de Vicepresidencia da Xunta de Galicia.
Texto completo
   

Comezan as clases na Escuela de Música Tradicional San Tirso do Eo

19.01.09

O pasado sábado 17 de Xaneiro, ás 11 da mañá, deron comezo as clases na Escola de Música Tradicional San Tirso do Eo, que foi presentada o 24 de Outubro de 2008 nun acto organizado a tal efecto. Pese a que o prazo para inscribirse aínda non está pechado, a xerencia da escola decidiu dar comezo ó curso para atender ás demandas dos 42 alumnos xa matriculados.

As materias ofertadas son Gaita tradicional, Percusión, Zanfona (impartidas por Vitor Otero), Canto e pandeireta, Baile tradicional (impartidas por Mónica Fernández), Acordeón, Piano, Música e movemento e Solfeo-Folklore (impartidas por Abel Pérez, director da Escola).

As clases impártense no Colexio CRA Occidente, El Llano - San Tirso de Abres, que mostrou un gran apoio a este proxecto, o cal conta coa colaboración da Caja Rural de Asturias.

Recordámoslles a tódolos interesados que o prazo de inscrición segue aberto.
   

Ghaiteirada na Baña

16.01.09


O próximo venres 23 de Xaneiro, dende as 21:00 h e ata que remate celebrarase unha ghaiteirada no Local Social da Baña (climatizado con lareira), situado na rúa de detrás do Centro Médico da Baña.

Poderase disfrutar, por poucos cartos, de chourizos ó viño, viño sen chourizos, cervexas, licor café, moita música, moito baile e moita festa.
Os beneficios destinaranse á organización da Festa Rachada.

Quedades invitado a asistir, e lembrade levar os instrumentos ou calzado cómodo.

Organiza: EMT da Baña
   

O VICEPRESIDENTE DA XUNTA DE GALICIA VISITA A TRADESCOLA

14.01.09


A Asociación de Gaiteiros Galegos recibiu, o pasado día 13 de Xaneiro nas instalacións da Tradescola, a visita de numerosas autoridades, entre as que destacou o Vicepresidente da Xunta de Galicia, Anxo Quintana, acompañado polo Conselleiro de Innovación e Industria, Fernando Blanco, o Director Xeral de Xuventude, Rubén Cela, a Delegada de Vicepresidencia en Lugo, Branca Rodríguez Pazos e o Vicepresidente Primeiro da Deputación de Lugo, Antón Bao.

No transcurso deste encontro, os ilustres visitantes non dubidaron en resaltar o bo traballo que está a realizar a Asociación de Gaiteiros Galegos con proxectos como a TRADESCOLA, que serven para difundir a nosa cultura e ofrecer formación a tódalas persoas interesadas na música e no baile tradicional.

A cita tivo lugar dentro dos actos de inauguración das instalacións do Complexo Residencial Xuvenil LUG II, sé da Escola de Música Tradicional da AGG.
   

O Tragasons, novo programa de radio en galego

13.01.09

Un novo programa radiofónico sae á luz esta semana: O Tragasons, unha produción de Mapamundi Radio realizada en galego-portugués coa intención de divulgar as músicas do mundo no ámbito da Galego-Lusofonía, tendendo pontes entre Galicia, o resto de países lusófonos e calquera lugar do mundo onde haxa quen fale a nosa lingua común. Comezan as súas emisións en Radio Filispim de Ferrol (Galicia) e Radio ELA de Madrid, nunha iniciativa aberta a ser emitida libremente por todas as emisoras de Galicia, Portugal, Brasil e do resto do mundo que o soliciten.
   

DANZA DE SAN SEBASTIAN EN ALDÁN

13.01.09

O vindeiro martes, 20 de Xaneiro, celebrarase a Danza de Aldán na parroquia do mesmo nome, en Cangas do Morrazo. Esta danza tan sorprendente e particular celébrase desde fai máis de 300 anos, e ten relación con outras danzas que se realizan na comarca do Morrazo.

A Danza de San Sebastián ten lugar cada 20 de Xaneiro en Aldán, coincidindo coa festividad deste santo. Nela participan 10 galáns, cinco damas e unha guía. Os homes levan un traxe negro, chapeu de fieltro e zapatos negros. No peito levan unha banda coas cores da bandeira nacional. As mulleres van vestidas de branco, mantón de Manila, mandil negro, panos de distintas cores sobre os ombreiros e uns vistosos chapeus adornados con flores e cintas como símbolo de fertilidad.

A procesión de San Sebastián acompáñase dita danza na cal non hai cánticos, só gaita e tambor. Iníciase o baile pedindo permiso ao Santo e durante a marcha realízase unha danza e unha contradanza. O baile dura unha hora e acaba cunha muiñeira ante a imaxe de San Sebastián. O baile xurdiu como unha ofrenda ao Santo para que librase aos veciños da peste.
   

RUADA EN SANTAIA DE GORGULLOS

24.12.08

A Asociación Cultural Brisas do Quenllo, coa colaboración do Bar Becerra, organiza este venres día 26 de decembro unha ruada en Santaia de Gorgullos (concello de Tordoia).

Nesta ruada daráselle unha merecida homenaxe a "Flor da Maquía", o señor Florentino, un gaiteiro de 80 anos,moi ben levados, que dende moi novo percorreu as terras da comarca de Ordes coa súa gaita en varios cuartetos ilustres do lugar. Hoxe conserva un repertorio amplísimo e unha dixitación propia da zona, do que nos dará conta. A parte de ser unha persoa entrañable mantén un amor pola gaita impresionante, cabe destacar que por problemas de saude, non pode soprar, polo que se inxeniou mediante un barquín de pé para poder seguir tocando sen forzar os pulmóns.

Acompañarán tamén nesta ruada os Panxoleiros de Santaia (Tordoia), o grupo Maghúa (Coruña), Pandereteiras Bouba (Tordoia), os vellos pandereteiros e bailadores da comarca... Prégase a todo músico interesado que traia instrumento, pois haberá un oco para todos e cada un dos que queiran botar unha peza.

Celebrarase no Bar Becerra, en Santaia (Concello de Tordoia), comezará ás 22:00 horas, e rematará cando o corpo non poida máis. Quedades todos convidados.
   

SETIMAS NOITES DE TASCA

23.12.08





O próximo venres 26 de Decembro, a partires das 21 h., celebraranse as Sétimas Noites de Tasca no Bar Calviño en Pontepedra (Tordoira). Esta xornada, organizada pola Asociación Grupo de Gaitas Os Viqueiras de Ordes, contará coa presenza de Os Receiros de Ponte Carreira (Frades), os Panxoleiros de Santaia e os Vellos Pandereteiros e Bailadores de Tordoia.
A organización estende unha cordial invitación para todas aquelas persoas ás que lles apeteza ir tocar con eles; ademais, os participantes recibirán un agasallo.



   

Páxina 218 de 229