Asociacion de Gaiteiros Galegos

Gaiteiros galegos
Inicio / Novas / Varios

Varios

PARADA DA ETNOGRAFÍA MUSICAL GALEGA

28.09.07

A Parada da Etnografía Musical Galega é unha acción comunitaria de divulgación e educación popular sobre o patrimonio cultural galiciano, no eido temático da etnografía musical e o seu contexto interpretativo de relación: as persoas, a comunidade, a artesanía, a danza, a cantiga, os instrumentos, os materiais, a artesanía, os oficios, os espazos antropolóxicos, e a súa evolución ata a actualidade.

Esta Iª Parada da Etnográfía Musical de Galicia conta cos seguintes contidos: un museo vivo, seminarios formativos (que terán lugar o sábado 29 de setembro e o sábado 6 de outubro), un encontro de entidades e grupos folclóricos, obradoiros, mostras, etc.

Do 24 de setembro, ao 11 de Outubro, no Centro Cívico Social de S. Xiao de Narón, tedes a oportunidade de coñecer un pouco mais sobre a Etnografía musical do noso pobo.

Consulta aquí o programa
   

INAGURACIÓN DA ESCOLA DE BAILE E MÚSICA TRADICIONAL "REBULIR"

26.09.07

O Concello de Ramirás inaugurará o vindeiro Sábado día 6 de Outubro a súa primeira escola de Baile e Música Tradicional. O nome escollido para esta escola é o de “ Rebulir ”. Estará situada no Centro Sociocultural de San Andrés, no pobo de Vilavidal pertencente a dito Concello.

O curso partirá con un número aproximado de 40 alumnos de todas as idades, desde 4 anos en adiante. Impartiranse clases de Baile tradicional, Canto e Pandeireta, Gaita Galega e Percusión Tradicional, complementando a súa formación con nocións básicas da etnografía galega. Tamén se organizarán periodicamente outras actividades paralelas para o lecer dos dos alumnos e demais habitantes do Concello tales como : festivais, xornadas lúdicas, a II noite de fiadeiro, xornadas de xogos tradicionais ... etc. A matrícula nesta escola é totalmente gratuíta xa que está financiada na súa totalidade polo Concello de Ramirás.

Nace así un núcleo para a recuperación e mantemento da tradición neste recuncho da Provincia de Ourense, engadindo un granciño máis a contribución que algúns grupos están a facer a prol da cultura do noso país.

Para máis información chamar o teléfono 639 90 80 05 ou no correo de Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo – Alexandre Sotelino Losada ( Mestre da escola Rebulir)
   

CONFERENCIA SOBRE O CANCIONEIRO GALEGO DE TORNER E BAL Y GAY

19.09.07

O Xoves, 20 de setembro ás 20.00h terá lugar na Sede Fundación Barrié de la Maza en Vigo, unha conferencia a cargo de Carlos Villanueva, autor do estudo crítico do Cancioneiro galego de Eduardo Martínez Torner y Jesús Bal y Gay, reeditado pola Fundación.

O catedrático, mediante a súa investigación e análise, ofrecerá un esclarecemento sobre algúns puntos descoñecidos até agora do Cancioneiro de 1973.

Precisamente Carlos Villanueva, o autor do prólogo deste facsímil, é quen pon en valor o carácter renovador do compositor lugués. "Bal y Gay é un rexeneracionista natural, cun forte compromiso social", afirma o catedrático. Este carácter refléxase na forma que tiña de investigar a historia da música galega. "Buscaba o sentido da galeguidade, que non é outra cousa que buscar o esencial do folclore, a identidade dun pobo", di Villanueva. A isto engádese a función divulgadora que lle imprime ao seu traballo, xa que, "todo o que aprende difúndeo en conferencias e concertos".

A entrada para asistir a esta conferencia será libre ainda que hai un aforo limitado.
   

I Encontro de Gaiteiros - Paços de Ferreira

06.09.07


O próximo 15 de Setembro de 2007 celébrase en Paços de Ferreira (Portugal) o I Encontro de Gaiteiros. Unhas xornadas de convivencia e intercambio abertas a todos os gaiteiros, percusionistas e músicos em xeral. Entre as actividades que se celebrarán, compre destacar un almorzo para os participantes ofrecido pola C. M. de Paços de Ferreira na Casa da Eira - Parque urbano. Para participar en dito xantar, é preciso achegar inscrición con: Nome, Procedencia, contacto e instrumento que se toca, a:

Nuno Oliveira: (+351) 91.8185859
Rui Santos: (+351) 93.6604211
Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo


PROGRAMA DE ACTIVIDADES

10.00h – Recepção dos convidados - Concentração no parque urbano
11.00h – Alvorada
12.30-14.30h – Almoço-convívio
15.00-16.00h – Desfile de gaitas e percussões
21.00h – Actuações livres na Casa da Eira

Org. Capital Artes / C. M. de Paços de Ferreira
   

UN BLOGUE INTERESANTE

27.08.07


Dende a comunidade escolar do C.E.P. Brea Segade invítannos a visitar este blogue, www.blogoteca.com/educaldea , no que se ofrece un bó arquivo de partituras de gaiteiros e músicos do Concello de Rianxo, así como unha boa galería de fotos.

Nel xa está a disposición, para uso público, todo o material que están a recoller no seu traballo de campo. Eles consideran que as recollas só serven se as devolven ao seu único dono, o pobo..

Tamén crearon neste centro escolar, un museo, o Museo Pedagóxico Castelao, onde contan con moita música impresa para banda, instrumentos musicais, fotografías e ata o traxe orixinal (anos 40) do Ramón Carou, gaiteiro de Airiños da Nosa Terra de Asados.

Calquera suxerencia sobre a música en Rianxo, será ben recibida por esta comunidade escolar que traballa por dar a coñecer un pouco mais a nosa música tradicional.
   

"VAI DE CAMIÑO", UN NOVO ÉXITO NA SÚA SEGUNDA EDICIÓN

23.08.07

A II edición do programa “Vai de Camiño”, da Consellaría de Innovación e Industria, achegará ata o mes de setembro as actuacións de 181 artistas galegos a máis dun centenar de concellos polos que atravesan os Camiños de Santiago.

Así , ao longo da vindeira fin de semana do 25 e 26 de Agosto, artistas como Narf, Xosé Manuel Budiño, Daniel Bellón e Diego Maceiras, Mercedes Peón e varios grupos de música tradicional como Tinta Femia, Os Enxebres de Cacheiras, Xironsa ou Os Campantes da Baña actuarán nos municipios de Muxía, Miño, Melide, Pontedeume, Arzúa (A Coruña); Ribadeo, Paradela (Lugo) e Dozón (Pontevedra).

A Consellaría de Innovación explicou nun comunicado que volveu a poñer por segundo ano en marcha o programa, que comezou o 1 de xuño, tralo éxito da programación do ano pasado e “a novedosa experiencia da primeira edición do Vai de Camiño en canto á promoción dos músicos e artistas galegos”.

Tamén afirman dende a Consellaría que “a programación é moi variada e tenta dar cabida ao máis representativo do panorama actual galego. Consolídase así un circuíto que está a dinamizar durante o verán as vilas dos Camiños de Santiago”.
   

REDE GALEGA DE MÚSICA AO VIVO 2008

10.07.07


Un ano mais a Asociacion de locais de musica ao vivo "Clubtura", integrada neste momento por unhas 50 salas e o IGAEM, pertenecente a Dirección Xeral de Creación e Difusión Cultural da Consellaría de Cultura e Deporte, ven de firmar un convenio para poñer en marcha a Rede Galega de Música ao Vivo do ano 2.008.

Xa está colgada na web do IGAEM a información relativa a este novo circuíto, para o que se abriu o prazo de inscrición -até o día 3 de Agosto- dirixido a todas as formacións musicais, de calquera estilo, interesadas en participar.

Tedes un enlace, ademais, ao documento coas normas de funcionamento da RGMV, que podedes consultar no caso de que estedes interesados, tanto grupos, como salas en participar neste novo proxecto, e onde tamén atoparedes as normas do proceso de programación.

Rede Galega de Música ao Vivo
   

PHOENIX, ESPECTÁCULO MULTIMEDIA

05.07.07

O vindeiro sábado, 7 de Xullo, na Carballeira das Ermidas(Concello da Lama), terá lugar a participación de Xosé Manuel Budiño no espectáculo multimedia PHOENIX, onde Budiño lle porá, cun concerto, a música ás fotografías de X.M.Albán.

A festa comezará ás 18:00 h cunha romería popular con pulpeiras é gaiteiros para animar o ambiente, mais tarde, ás 23:00 h poderemos disfrutar do espectáculo audiovisual con videocreacións en directo de F.I.N.

Se queredes mais información, podedes atopar un video-presentación en youtube, buscando Albán + Phoenix.
   

II MOSTRA DE FOLCLORE TRADICIONAL DE BRINCADEIRA

25.06.07


O vindeiro sábado, 30 de Xuño, a partir das 21:00 horas, no Teatro Principal en Santiago de Compostela, terá lugar a II Mostra de folclore tradicional do grupo Brincadeira.

Ao longo dunha hora e media coñeceremos de primeira man o traballo feito polo alumnado desta escola de baile, gaita, percusión, pandeireta e acordeón, realizado ao longo de todo o curso. Tres grupos de cada disciplina (o dos cativos, e de adultos, iniciación e perfeccionamento) en baile, pandeireta e gaita, tambor e máis bombo, pasarán polo escenario do Teatro Principal.

Amosarán diferentes pezas tradicionais recollidas nas diferentes comarcas galegas, tentando reflectir da maneira máis fiel posible a cultura tradicional. Por suposto, vestidos co traxe tradicional, co que ademais poderemos gozar da riqueza e variedade das pezas, tanto de cotío como de gala, de distintas zonas de Galiza, de xeito que coñeceremos de xeito integral a nosa cultura.

Horario: 21:00 h.

Lugar:
Teatro Principal
Rúa Nova, 21. 15701, Santiago de Compostela

Prezo: De balde
   

II FERIA DE FOLKLORE EN PORTUGALETE

31.05.07


Os días 8, 9 e 10 de Xuño tivo lugar a II Feria de Folklore en Portugalete (Vizcaia). Todos os interesados puderonse achegar ata á Plaza del Solar, no Mercado de Abastos, onde atoparon unha das mellores mostras de artesanía que non vos debichedes perder.

O Centro de Cultura Tradicional Elai-Alai é o encargado da organización desta feria de Folklore, traballando a favor da cultura tradicional dunha forma anónima. Con esta feira, preténdese crear un espazo de reunión no que se mostre ó público esta labor e así facer da nosa cultura algo interesante para as novas xeracións.

Ás 10:00 horas realizouse a apertura da feira podendo asistir ós diversos talleres: percusión, baile, cerámica, cancións tradicionais, etc. Tamén houbo dous escenarios, nos que se sucederon talleres, concertos, espectáculos e incluso unha romería o sábado á noite.Tanto o sábado como o domingo, non faltou a animación polas rúas a cargo de diversos grupos da zona.

Todos os que tivéchedes a ocasión de asistir, houbo aquí unha boa oportunidade de coñecer un pouco mais de cerca a tradición.
   

Páxina 210 de 215