Asociacion de Gaiteiros Galegos

Gaiteiros galegos
Inicio / Novas / AGG

AGG

A ASOCIACIÓN DE GAITEIROS GALEGOS CONMEMORARÁ ESTE ANO O SEU 20 ANIVERSARIO

30.01.08

A xunta directiva da Asociación de Gaiteiros Galegos celebrou, o pasado 27 de Xaneiro en Pontevedra unha xuntanza para pechar o programa de actividades que conmemorarán, ao longo deste ano 2008, os 20 anos de vida desta asociación. Os actos de celebración destes 20 anos de existencia da AGG (Asociación de Gaiteiros Galegos) terán como obxectivo fundamental achegar á sociedade a música tradicional galega e poñer en valor a figura do músicos, bailaríns, artesáns e demais persoas que durante decenas de anos mantiveron viva esta expresión da nosa cultura que é, sen dúbida, unha das máis ricas de Europa.

Ao longo deste ano 2008 a AGG levará a cabo algunhas actividades especialmente deseñadas para conmemorar o seu 20 aniversario. Estas actividades completarán a actividade anual que a AGG ven programando de xeito periódico para a difusión, formación e promoción no eido da música tradicional galega, é de destacar a organización de mostras de artesáns como as de Pontevedra ou Pardiñas (Guitiriz), a edición de libros-cd como O Quiquiriquí ou o Pelogato 24, a realización anual dun Congreso de Ensinantes de Música Tradicional Galega, edición dun boletín trimestral Aturuxo, a participación no espazo O Recuncho da Palleta dentro do programa Lume na Palleira da Radio Galega, a xestión de unha aula de Zanfona na cidade de Lugo, a organización do Encontro de Tocadores de Trompa na Fonsagrada e do Seminario sobre a Palleta en Melide.

A AGG conta neste momento con máis de 600 asociados e asociadas distribuídas por todas as comarcas galegas e na Galiza exterior. A través dos seus asociados, ten presenza na maior parte das asociacións e colectivos culturais que desenvolven actividades en torno á música tradicional no país. A AGG é a entidade asociativa máis representativa e con maior peso específico no tocante á música tradicional en Galiza ademais de ser a única asociación de ámbito autonómico e cun proxecto de organización con visión de País.

Segundo o presidente da AGG, Santiago Caneiro Aneiros, “é para nos unha responsabilidade facer que todas as persoas que teñan algo que dicir sobre a nosa música tradicional, en todas as súas vertentes, participen activamente na consolidación deste proxecto asociativo”. Con estas declaracións Santiago Caneiro fixo referencia ao empeño que a AGG ten en abrir as súas portas a todos aqueles músicos, artesáns, bailaríns, e demais persoas vencelladas á música tradicional galega.
   

"PELO GATO 24", O NOVO TRABALLO AUDIOVISUAL DA AGG

07.01.08

Xa está no mercado o "PELO GATO 24". Este novo traballo está impulsado e producido pola Asociación de Gaiteiros Galegos, realizado por Casa de Tolos e coeditado pola Dirección Xeral de Creación e Difusión Cultural e PAI-Música. Trátase dun libro, un CD e un DVD co que AGG segue a apostar pola divulgación da música tradicional entre @s nosos cativ@s e "Pelo gato 24" preséntase como un bo xeito de materializar este obxectivo.

O CD de audio consta de 13 cantigas tradicionais para nen@s, que baixo a dirección musical de Paulo Nogueira e Magoia Bodega foron interpretadas por cantantes e músicos do prestixio de Leilía, Fuxan os Ventos, Migallas, Xabier Díaz, Mercedes Arribe, Sonia Lebedynski, Sra. Carmen, Xurxo Souto, César Longa, Begoña Riobó, Pancho Álvarez, Segundo Grandío, Xosé Liz e a charanga "Vai de Baile".

O DVD está formado por un docufilm dirixido por Pablo Carpintero e Gustavo Couto sobre os xogos tradicionais, ademais dun "Como se fixo" e os videoclips e playbacks das cantigas. Se queredes obter mais información, non deixedes de visitar a páxina web www.pelogato24.com

Os socios da AGG xa podedes mercar o voso exemplar do "Pelo Gato 24" a traves da Asociación. O prezo é de 10 € + gastos de envio contra reembolso. Podedes solicitalo a través do correo electrónico: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo ou ben chamando ó número de teléfono 986 847 074. Tamén tedes a opción de mercalo directamente na nosa oficina situada na rúa Alfonso XIII, nº7 en Pontevedra. Lembrade que é unha oferta só para asociados.
   

ACTAS DO I CONGRESO DE ENSINANTES DE MÚSICA TRADICIONAL GALEGA

14.12.07

Xa están publicadas as actas do I Congreso de Ensinantes de Música Tradicional Galega que a Asociación de Gaiteiros Galegos organizou o 18 e 19 de novembro do pasado ano 2006 en Santiago de Compostela. Nelas recóllense todos os relatorios, mesas redondas e comunicacións que se presentaron neste importante evento.

Nesta publicación pódese atopar información sobre temas tan interesantes como o ensino do canto tradicional, as perspectivas de futuro do ensino da música tradicional, metodoloxías e espazos para a aprendizaxe do baile tradicional galego, etc.

Todos os participantes no I Congreso recibirán, en breve, unha copia gratuita por correo postal. Os socios da AGG tamén poden solicitar o seu exemplar gratuito no teléfono 986 847 074 e recibilas por correo postal, asumindo os custes de envío, ou ben recollelas no local da nosa oficina situada no seguinte enderezo:

Rúa Alfonso XIII, nº 7 - Oficina 8 (2º andar) - Pontevedra

O horario de atención ó público é de 9 a 14 h. e de 16 a 19h.

Os demais interesados poden adquirilas a un prezo de 10 Euros. Para máis información, poden chamar por teléfono ou mandar un correo electrónico a Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo
   

TRABALLANDO NO III CONGRESO DE ENSINANTES

11.12.07

A pasada fin de semana do 7,8 e 9 de decembro tivo lugar o II Congreso de Ensinantes de Música Tradicional Galega no Auditorio de Galicia, en Santiago de Compostela. O evento estivo organizado pola Asociación de Gaiteiros Galegos en colaboración ca ASPG e a CIG Ensino, e patrocinado pola Dirección Xeral de Creación de Difusión Cultural da Xunta de Galicia e a Concellería de Cultura do Concello de Santiago. Tamén colaboran as Universidades de A Coruña e Vigo xunto co Auditorio de Galicia.

Ao acto inaugural asistiron as seguintes personalidades:

• D. Xosé Luis Bará Torres – Director Xeral de Creación e Difusión Cultural
• D. Nestor Rego Candamil – Concelleiro de Cultura e Centros Socioculturais do Concello de Santiago
• D. X. Anxo Varela Centelles – Técnico do departamento de promoción cultural do Xacobeo.
• D. Luciano Fernández Martínez – Membro da Xunta Directiva da ASPG
• D. Anxo Louzao Rodríguez – Secretario Nacional de CIG-Ensino
• D. Santiago Caneiro Aneiros – Presidente da Asociación de Gaiteiros Galegos

Foi, sen dúbida, un fito histórico, non só pola calidade dos relatores, senón tamén pola cantidade de congresistas inscritos, xa que se completou o aforo de 260 prazas, o que demostra o grande interese suscitado polos debates, obradoiros e relatorios que se programaron así como polas propostas que poden xurdir deste importante evento.

Tamén queremos agradecer publicamente ás institucións que colaboraron para levar adiante este complexo proxecto, ós relatores, participantes en mesas e congresistas, a súa amabilidade e bo facer, que contribuíron a que todo o congreso se desenvolvera nun excelente clima de traballo.

A Asociación de Gaiteiros Galegos pretendeu coa realización deste segundo congreso, promover lazos de coñecemento, recoñecemento e confianza entre os distintos ámbitos educativos da música galega, co obxecto de permitir unha comunicación fluída de experiencias e para, poder pór en marcha iniciativas conxuntas que teñan continuidade no futuro, no que xa estamos a traballar coa preparación do terceiro Congreso.
   

INAUGURACIÓN DO II CONGRESO DE ENSINANTES O VENRES 7 DE DECEMBRO

03.12.07

O vindeiro venres 7 de Decembro, ás 16:30 h., terá lugar a inauguración oficial do II Congreso de Ensinantes de Música Tradicional Galega no Auditorio de Galicia, en Santiago de Compostela.

Previamente, ás 16:00 h. realizarase a recepción e o reparto de material a tódolos inscritos, que este ano alcanzan unha cifra importante, o que demostra o interés suscitado por este proxecto e os seus contidos.

Durante a fin de semana do 7, 8 e 9 de Decembro, poderanse escoitar un total de cinco relatorios levados a cabo por importantes investigadores e docentes galegos que tratarán temas tan interesantes como os “coidados básicos da voz e exercicios prácticos para cantar dun xeito saudable”; “xogos populares e tradicionais galegos”; así como a “aplicación das novas tecnoloxías no ensino da música tradicional”.

Tamén contaremos con obradoiros prácticos como por exemplo un “taller de construcción de xoguetes sonoros” ou “cantigas para os máis pequenos”. Estes relatorios e obradoiros alternaranse con mesas redondas onde se debaterán temas relacionados coa música tradicional, e ademais presentaranse as comunicacións seleccionadas entre as propostas recibidas para este Congreso.

Atoparedes toda a información necesaria nas novas do noso portal e manterémosvos ao tanto do desenvolvemento xeral de todas as actividades.

Información sobre o Congreso
   

II CONGRESO DE ENSINANTES DE MÚSICA TRADICIONAL GALEGA

21.11.07

Coa experiencia da primeira edición do Congreso, e constatado o interese xerado polos seus contidos, participantes e desenvolvemento xeral, como a resposta positiva dos asistentes, A Asociación de Gaiteiros Galegos, asume o reto de reeditar a cita e avanzar nas súas propostas.

O II Congreso de Ensinantes de Música Tradicional Galega celebrarase no Auditorio de Galicia, en Santiago de Compostela, os días 7, 8 e 9 de Decembro e pretende abarcar todos os ámbitos educativos de música tradicional existentes na actualidade en Galicia e tamén incluír a maioría das disciplinas que se imparten nos distintos centros.

Trátase de non excluír a ningún profesor ou profesora, alumna ou alumno, para que toda a comunidade educativa se vexa implicada neste proxecto e poida tirar conclusións que lle axuden no seu traballo diario.

Nesta ocasión, ademais de tratar a situación do ensino da música tradicional nas escolas de música, conservatorios e asociacións culturais, centrarémonos especialmente no ensino obrigatorio. O futuro das nosas tradicións, da nosa música, a nosa lingua, canto e baile, pasa inevitablemente pola transmisión destes coñecementos ás novas xeracións, para que saiban conservalos e respectalos.

Aquí xoga un papel importantísimo a escola, e dentro dela os mestres e mestras, aos que debemos proporcionar os materiais, métodos e asesoramento preciso para desenvolver tan importante faceta.

Máis información e boletín de inscrición
   

GRAN ÉXITO DE PÚBLICO NA MOSTRA DO PCI GALEGO-PORTUGUÉS EN PONTEVEDRA

13.11.07

Do 7 ao 11 de novembro tivo lugar en Pontevedra a "Mostra do Patrimonio Cultural Inmaterial Galego-Portugués" na que todos os asistentes tiveron a oportunidade de coñecer un dos varios proxectos que se están a levar a cabo en defensa da cultura e tradición Galega.

O Proxecto Ronsel, promovido polas tres Universidades de Galicia e a Xunta de Galicia, en colaboración coa asociación “Ponte...nas Ondas!” e a Asociación de Gaiteiros Galegos, organizou este evento co patrocinio dos parceiros xa mencionados e do Concello de Pontevedra.

Durante estos días, tivemos a oportunidade de coñecer máis a fondo algúns dos exemplos máis representativos do noso patrimonio inmaterial. Así puidéronse visitar distintos obradoiros, como os de olaría, forxa, luthería, ourivaría, xogos tradicionais, etc. Tamén contouse cunha gran oferta audiovisual e exposicións permanentes coas que se pretendía achegar formas, materias e sensacións do noso patrimonio a tod@s @s que alí se achegasen.

Durante a fin de semana celebrouse, como parte da mostra, o festival de música tradicional no que participaron grupos coma A Gaita de Sarandón, o cuarteto Picuiña, Ruote, etc. e gaiteiros tradicionais tanto galegos como portugueses, entre os que se encontraban Manuel Viqueira e José Marentes pola parte galega e Joaquim Pereira "O Carriço" xunto con Antonio Ribeiro "O Toni das Gaitas" pola parte portuguesa. O sábado pola noite, a VI Mostra da Oralidade Galego-Portuguesa, tamén reuniu a representantes de ambas culturas tradicionais.

Un dos obxectivos da realización da "Mostra do Patrimonio Cultural Inmaterial Galego-Portugués" foi o de visibilizar este patrimonio e concienciar a sociedade da necesidade de salvagardalo e manter así vivo un importante pouso de coñecementos tradicionais que non debemos perder.

Reportaxe fotográfico da Mostra
   

FESTIVAL DE MÚSICA TRADICIONAL NA MOSTRA DO PCI GALEGO-PORTUGUÉS

09.11.07

O venres 8 de Novembro comeza o Festival de Música Tradicional organizado pola Asociación de Gaiteiros Galegos dentro da "Mostra do Patrimonio Cultural Inmaterial Galego-Portugués", que se está a celebrar na Praza da Ferrería en Pontevedra.

Durante toda a fin de semana contaremos con diversas actuacións de representantes da música tradicional, tanto galega como portuguesa. Así, o venres 9 de novembro, a partir das 20:30 h. participarán os seguintes grupos:

- Cuarteto Tradicional Picuiña de Marín
- Os Terribles de Donas
- A Gaita de Sarandón

Durante estas actuacións poderase asistir a un obradoiro de baile tradicional impartido por Gustavo Couto e degustar os augardentes destilados nestes días polo noso poteiro.

O sábado 10 de novembro terá lugar a VI Mostra da Oralidade Galego-Portuguesa coa colaboración da asociación “Ponte ... nas Ondas!” e da Asociación de Gaiteiros Galegos a partir das 20:30 h. Estarán presentes os Pauliteiros de Sendim (Terra de Miranda, Tras-os-Montes, Portugal), Caretos de Podence (Portugal), Zés Pereiras de Vilaverde-Braga e Suso e Antonio de Xornes (Ponteceso).

Ás 22:30 h. continuaremos coa Charanga de Ultreia e pandereteiras e gaiteiros de Pontecaldelas, Toutón, A Ermida e Gargamala. Mentres estas actúan haberá un obradoiro de baile tradicional galego a cargo de Luis Prego para que todos poidamos bailar os nosos ritmos agarrados e soltos.

Xa para o domingo, 11 de novembro, remataremos esta mostra coa queimada e degustación dos augardentes destilados polo noso
poteiro a partir das 19:00 h. e coa atuación do grupo Ruote a partir das 20:30 h.
   

INAUGURACIÓN DA MOSTRA DO PCI GALEGO-PORTUGUÉS

05.11.07

O mércores 7 de novembro de 2007, ás 19:00 horas, na Praza da Ferrería en Pontevedra, terá lugar a inauguración da Mostra do Patrimonio Cultural Inmaterial Galego-Portugués, organizada polo proxecto RONSEL en colaboración coa Asociación de Gaiteiros Galegos e a Asociación “Ponte...nas Ondas!”.

Este evento celebrarase do 7 ao 11 de novembro dedicando cada un dos días a un dos ámbitos nos que a UNESCO clasifica o PCI. Así o mércores día 7, comezaremos co "Día da Oralidade", no que poderemos disfrutar de actividades dende ás 10:00 ata as 20:00 h. Aquí tedes o programa para ese día:

Mañá, obradoiros de 10:00 a 14:00:

-Olaría (Tomás López, de Corbelle, Proendos, Sober, Lugo)
-Regueifas (O Caruncho e o Pinto d’Herbón)
-Forxa (Oliverio Alvarez, Queixoiro, A Fonsagrada, Lugo)
-Luthería (Germán Arias, Sarria, Lugo)
-Ourivaría (Arlindo, Oficina do Ouro, Sobradelo da Goma)
-Redeiría (Beatriz Molanes de Cangas e Josefa Abal de Cambados)
-Cantos de cego (Carlos do Viso)
-Torneiro (Oli Xiraldez, Cascandelo, Balcaide, Teo)
-Obradoiro de xogos tradicionais organizado pola Asociación Brinquedia

Tarde, continuación dos obradoiros da mañá, de 16:00 a 19:00, e conferencias:

-17:30 h. Descuberta e partilha dum patrimônio comun. Alvaro Campelo (Universidade de Porto) e
Xerardo Pereiro (UTAD).
-18:10 h. Vida e Fala do afiador ambulante. Antonio Fidalgo Santamariña (Universidade de Vigo).
-19:00 h. Acto de inauguración oficial da mostra.
-19:30 h. Proxección do documental Ainda há pastores? de Jorge Pelicano.

A Asociación de Gaiteiros Galegos quere convidar a todo o mundo a participar nesta mostra representativa do noso patrimonio cultural.
   

INAUGURACIÓN DA IV MOSTRA DE CUARTETOS DE MARÍN

31.10.07

A Asociación de Gaiteiros Galegos inaugura o vindeiro venres, 2 de Novembro ás 20:00 h. no Museo Municipal Manuel Torres de Marín (Avda. De Ourense,3) a IV Mostra de Cuartetos tradicionais. Esta actividade, promovida pola AGG e patrocinada pola Consellaría de Cultura e Deporte da Xunta de Galicia e o Concello de Marín, pretende afondar no coñecemento dunha das formacións máis importantes dentro da nosa música tradicional como é o Cuarteto de dúas gaitas, tambor e bombo.

O venres 2 de novembro, as actividades comezarán cun pequeno concerto do cuarteto "Picuiña" de Marín no Museo Manuel Torres ás 20:00 h. e seguidamente, organizarase un magosto na praza da Veiguiña, que estará aberto á participación de tódolos cuartetos que o desexen, potenciando a participación de cuartetos que estean comezando e, facilitando que experimenten a sensación de animar unha festa popular como facían os cuartetos nas súas orixes. Haberá castañas de balde.
   

Páxina 16 de 22